Siglir tar il cuntegn
cuntegn

Svizra Firma svizra exportescha substanza per tissi da cumbat

La fin dal 2014 ha ina firma svizra furnì passa tschintg tonnas Isopropanol en Siria. Il liquid serva, tranter auter, per producir il tissi da cumbat – Sarin.

Um cun ina mascra da gas
Legenda: Cun Isopropanol po ins producir il tissi da cumbat Sarin. Keystone

Il secretariat da stadi per l’economia (SECO) ha autorisà l’export da la substanza Isopropanol. Quai mussan retschertgas da la televisiun romanda RTS, che la Confederaziun ha confermà.

La substanza na fetschia betg part a la cunvegna d'armas chemicas. Ozendi autorisessian ins, areguard il svilup en la Siria, dentant probablamain betg pli l'export da la substanza, ha il SECO communitgà.

Basa per Sarin

Tar Isopropanol sa tracta quai dad in dissolvent che po era vegnir duvrà per producir il gas toxic Sarin. Il tissi Sarin è vegnì duvrà tar in’attatga or da l’aria da l’armada siriana en il nord dal pajais. Quai è cumprovà.

Pensà per la farmaceutica

La substanza era previsa per producir medicaments. L’intent d’utilisaziun ha el valità sco plausibel. Uschia argumentescha il SECO sia decisiun. Oz decidess ins probablamain auter, uschia il SECO vinavant.

Far glisch en il cas

La Cumissiun per la politica da segirezza dal Cussegl dals chantuns vul laschar sclerir il cas. Ella vul surtut savair sche las leschas èn vegnidas resguardadas u sch’i dat forsa ina fora en la lescha.

RR novitads 21:00