La cumissiun per la sanadad dal Cussegl naziunal accelerescha la finanziaziun unitara da purschidas ambulantas e staziunaras da sanadad. Oz ha ella tramess en consultaziun la proposta. Ils chantuns n'èn betg intgantads.
La proposta da la cumissiun sa restrenschia sin quai, ch'ella veglia investir ad onn 8 milliardas francs da las impostas chantunalas per las cassas da malsauns. Quai n'haja dentant betg l'effect da reducir ils custs, di la Conferenza dals directurs da sanadad. Perquai vegn la conferenza proxim'emna probablamain a refusar la proposta.
Promover las prestaziuns ambulantas
En emprima lingia vai per la controlla. Actualmain indemniseschan las cassas da malsauns tut ils custs per prestaziuns da sanadad ambulantas. Las prestaziuns staziunaras percunter vegnan indemnisadas per almain 55% dals chantuns – il rest pajan las cassas da malsauns.
La midada da la lescha ha la finamira, da finanziar tut las prestaziuns a moda unitara. Da princip duessan las cassas da malsauns indemnisar tut las prestaziuns ambulantas e staziunaras. Ils chantuns pajassan in import d'almain 25,5% dals custs che restan suenter trair giu la franschisa e la quota persunala. En media avessan ils chantuns uschia pajà cun quest sistem 7,5 milliardas francs ad onn dal 2012 fin il 2015.
Cun il nov sistem vuless la cumissiun cuntanscher, che dapli prestaziuns da sanadad vegnissan purschidas ambulant. Per regla è quai numnadamain pli bunmartgà. Ultra da quai duai il provediment coordinà daventar uschia pli attractiv.
RR novitads 16:00
