Siglir tar il cuntegn

Header

audio
Finanzas federalas: Midada dal clima e la demografia en il center
Or da Actualitad dals 23.11.2021.
laschar ir. Durada: 04:20 minutas.
cuntegn

Finanzas federalas Daivets da corona betg la gronda sfida

La populaziun adina pli veglia, ils custs da sanadad pli auts e la midada dal clima strapatscheschan las finanzas publicas enfin il 2050. A questa conclusiun vegn in studi da l'Administraziun federala da finanzas.

Il studi mussa che la pandemia da corona e las expensas da milliardas dal stadi na vegnian betg ad avair consequenzas a lunga vista per las finanzas statalas. Quai sut la premissa ch'ils daivets vegnian bajegiads giu enfin la fin da quest decenni, e sch'i dettia naginas midadas ni excepziuns tar il frain a l'indebitament da la Confederaziun. Pli grondas consequenzas enfin l'onn 2050 hajann però la midada dal clima e la demografia, scrivan ils auturs dal studi.

Demografia sa sviluppa preoccupant

La vegliadetgna creschenta da la populaziun e la generaziun dals uschenumnads 'Baby Boomers' che cuntanscha la vegliadetgna da pensiun han in grond effect. Entant ch'ins ha dumbrà il 2020 anc 3,2 persunas en la vegliadetgna da lavurar, vegnan quai ad esser il 2050 mo pli 2,1 persunas. Senza cuntramesiras – sco ina refurma da l'AVS ed ina meglra controlla dals custs da sanadad – s'augmentia la quota da daivets dad oz circa 30% sin 50% enfin l'onn 2050. 

Consequenzas intschertas da la midada dal clima

Examinà ha l’Administraziun federala da finanzas era las consequenzas da la midada dal clima. Cumbatter la midada e las consequenzas da quel per la Svizra muntia per la Confederaziun ils proxims decennis cunzunt dapli expensas. Quant auts ch’ils custs èn, saja dentant grev da calcular, hai num en il studi. L’emprim stoppia la Confederaziun investir blers daners per limitar il stgaudament dal clima, e pli tard pajar per ils donns che temperaturas pli autas e catastrofas da natira vegnian a chaschunar en Svizra.

RTR actualitad 17:00

Artitgels legids il pli savens

Scrollar a sanestra Scrollar a dretga