Siglir tar il cuntegn

Header

cuntegn

Svizra Fin d’alarm tar «20 minutas»: Il trojan è vegnì chattà e stiz

La pagina d’internet da 20 minutas era vegnida infizada tras software nuschaivla. Uss dat Tamadia fin d’alarm: Il trojan saja vegni chattà ed stiz. Da la pagina d’internet na dettia nagin privel pli.

audio
Trojaner 20 minutas
ord Il chavazzin dal di dals 08.04.2016. Maletg: Keystone
laschar ir. Durada: 2 minutas 54 Secundas.

La pagina d’internet da «20 Minuten» è infectada cun in trojan. Differentas interpresas sco er l’Administraziun federala han bloccà l’access a la pagina correspundenta, perquai che computers da visitaders pudessan s’infectar cun software nuschaivla.

Il post correspundent d’annunzia ed analisa da la Confederaziun MELANI che tschertga virus e verms per utilisaders privats e firmas pitschnas e mesaunas ha dà alarm. Sur la pagina d’internet da la gasetta «20 Minuten» pon computers vegnir infectads cun software nuschaivla.

La mira dal trojan: contos da banca d'utilisaders

L’applicaziun nuschaivla è in trojan dad e-banking cun il num «Gozi», sco Pascal Lamia, il schef da MELANI, ha ditg envers SRF. Il trojan emprova da survegnir access als contos da banca dals utilisaders.

Sco reacziun sin quest messadi han emprims concerns bloccà l’access al portal da «20 Minuten». Tranter questas firmas sa chattan l’Administraziun federala, la SRG e l’agentura da novitads SDA. Er la Swisscom ha entant bloccà l'access.

Infecziun è grev da constatar

Tgi che ha visita la pagina da «20 Minuten», possia avair s’infectà, ma na stoppia betg, uschia Lamia. I saja extrem grev da constatar, schebain l’agen computer saja infestà dal trojan. Suspectus sajan per exempel ina colliaziun fitg plauna, in visur blau u in appel dad adina puspè dar en il pled clav.

En tals cas recumonda Lamia d’immediat contactar la hotline da l’atgna banca.

Adina puspè attatgas virtualas

Deplorablamain sajan els regularmain la mira d’attatgas, ha ditg il pledader da Tamedia Christoph Zimmer envers l’agentura da novitads SDA. Mintga pèr mais reusseschia quai ad in attatgader da surmuntar ils sistems da segirezza.

L’interpresa lavura cun tutta forza da schliar il problem. Tenor Zimmer èn be computers da desktop pertutgadas. L’access via applicaziuns mobilas - cun ina cumpart da radund 80% - na saja betg pertutgà. Fin uss è l’autezza dal donn tras l’attatga betg clera.

RR novitads 18:00 / 20:00

Artitgels legids il pli savens