Siglir tar il cuntegn
cuntegn

Svizra Fin d'alarm a Berna

Pervia da la smanatscha d'attentat da bumba a Berna è sulet anc il conturn da la baselgia Heiliggeist e la baselgia sezza vinavant bloccada. Quai ha la polizia chantunala da Berna communitgà. Suenter d'ina smanatscha da bumba oz suentermezdi aveva la polizia chattà en la baselgia objects suspectus.

In giuven da 21 onns haja smanatschà d'envidar ina bumba en la baselgia Heiliggeist. L'um è uss en praschun. Quai ha chaschunà in engaschament da polizia cumplain.

Acziun gronda da polizia

Il venderdi suentermezdi aveva la polizia chantunala da Berna barricadà l'intschess enturn la baselgia Heiliggeist tar lal plazza da staziun principala. A las 13:30 era la polizia vegnida infurmada davart in um che deva en egl. Cura che la polizia è arrivada al lieu, purtava l'um objects suspectus, ha ina pledadra da polizia ditg. Lura ha la polizia prendì a ferm l'um e barricadà il lieu enturn la baselgia. Schebain ils objects fissan stads privlus n'è anc betg cler, ha la polizia communitgà vinavant.

Per motivs da segirtad è la regiun enturn la baselgia Heiliggeist stada serrada per circa tschintg uras. La polizia aveva appellà als passants dad ir davent da la plazza da staziun, uschia l'agentura da novitads SDA. Tenor rapports da perditgas èn emploiads da fatschentas vischinantas vegnids evacuadas, quai communitgescha l'agentura da novitads SDA.

L'areal pertutgà

La baselgia da Heiliggeist sa chatta a la staziun principala da Berna e visavi da la stizun «Loeb». Gist sper il tetg da vaider e tschintg minutas davent da la Chasa federala.

Impediments dal traffic public

Durant la barricada èsi vegni tar gronds impediments dal traffic public, scriva la polizia chantunala vinavant. La plazza da la staziun era serrada per tut il traffic tranter Bollwerk e Burgerspital. La staziun da tren n'è dentant betg stada pertutgada ed era cuntanschibla via Welle u Neuengasse.

RR novitads 15:00+