Passa la mesadad dals restaurants en Svizra quintan da far almain 30% damain svieuta, sch’els stoppian pretender dals giasts in certificat da Covid. A questa conclusiun vegnia ina retschertga che Gastrosuisse ha fatg tar passa 3'000 dals 20'000 commembers, sco Casimir Platzer, il president da l’uniun, ha ditg envers Radio SRF.
Jan-Egbert Sturm da l’Institut da la perscrutaziun da la conjunctura da l’ETH percunter relativescha il scenari. Vegnia la situaziun numnadamain mendra, restia la glieud uschè u uschia plitost a chasa. In certificat possia lura forsa schizunt dar schlantsch a la dumonda. Avant paucs dis ha il Cussegl federal decis da per il mument betg schlargiar l’obligatori dal certificat da Covid.