Il cannabis s' effectuescha directamain sin il metabolissem dal tscharvè, declera la manadra dal ambulatori «Neumühle» dals servetschs psichiatrics grischuns Margrith Meier. Quai possia alura avair differentas consequenzas. Ina saja per exempel il uschenumnà sindrom da demotivaziun. «Per exempel possia quai esser miserias da lavar la damaun per ir a scola ni a lavurar u ch’ins è stanchel e na po betg sa concentrar. Quai saja spezialmain per giuvenils problematic.»
In auter privel saja ch' il consum da cannabis possia chaschunar psicosas. Talas sajan sumegliantas a la schizofrenia. «Jau aud er mintgatant da persunas che han gia tar l' emprim ni segund consum da cannabis il sentiment d’esser dal tuttafatg sulets. Quai che na valia anc betg anc sco psicosa», ha ditg Meier. Er fa Meier attent sin las malsognas corporalas che possian vegnir tras il fimar cannabis.
Cannabis è derasà tar giuvenils da 15 onns
Malgrà tut las ristgas che vegnan cun fimar cannabis - la droga para d’esser derasada tar ils giuvens da 15 onns en Svizra. Pli derasada ch’èn auters pajais. Fan ins insumma avunda u la dretga prevenziun da drogas en Svizra? Prevenziun na saja anc betg fatga cun ir en scola avantmezdi e declerar tut ils effects da drogas, declera Meier. Ella saja dal avis che prevenziun saja insatge che cumenzia gia pli baud. Numnadamain cun esser in bun exempel. Saja quai sco geniturs, scolasts ni er il conturn e quai cun il consum d’alcohol ni era co passentar il temp liber.
Laschar spazi per lungurella
«Temp liber na muntia betg mo puncts da program. Ma er co van ins enturn cun lungurella. I saja impurtant dad integrar temps da ruaus, nua che er lungurella ha plaz. Temps en ils quals na betg mintga minuta saja planisada. Nossa societad veglia exnum evitar lungurella», manegia la manadra dals servetschs psichiatrics dal Grischun.