- 7 funcziunaris da la Fifa arrestads a Turitg
- Era arrestads èn 2 vicepresidents da la Fifa
- Ils funcziunaris duain avair acceptà milliuns
- L'elecziun dal president da la Fifa ha tuttina lieu il venderdi
- Plirs dals arrestads en sa declerads culpaivels, 6 refusan da vegnir extradì
En tut ha la polizia chantunala da Turitg uschia arrestà 7 persunas en il decurs da la mesemna. Las arrestaziuns sajan succedidas sin basa d’ina dumonda dals Stadis Unids da l’America, scriva l’Uffizi federal da giustia. Ultra da quai ha l'uffizi laschà bloccar contos tar pliras bancas svizras. Quests contos duain avair gidà da transferir milliuns da daners illegals.
Las persunas arrestadas
Detagls dals funcziunaris arrestads
Ils arrestads ils pli prominents èn 2 vicepresidents da la Fifa, Jeffrey Webb da la Gronda Britannia, ed Eugenio Figueredo dal Uruguay. Ils ulteriurs funcziunaris èn da l’America centrala, da l’America dal sid e da la Gronda Britannia.
Involvids en il cas èn 7 ulteriuras persunas, tranter auter l'anteriur vicepresident da la Fifa Jack Warner, e 5 manaders d'interpresas da marketing.
La Fifa ha infurmà
Sepp Blatter, il president da la Federaziun da ballape internaziunala, n'è betg in dals arrestads. Quai ha il pledader da medias da la Fifa, Walter de Gregorio, ad ina conferenza da medias. Blatter saja relativamain calm, damai ch'el na saja betg involvì. Infurmaziuns davart ils involvids n'ha de Gregorio dentant betg vulì dar.
La Fifa saja interessada ch'il cas vegnia sclerì, era sch'ella pateschia. Ed ils schabetgs mussian ch'els sajan sin buna via, ha de Gregorio ditg vinavant. La Fifa sezza haja numnadamain inizià ils scleriments.
Il congress da la Fifa
La Fifa planisescha da manar atras ses congress planisà per il venderdi a Turitg. Quai ha ditg il pledader da la Fifa, Walter de Gregorio. Ed era l'lelecziun dal president succedia sco planisà.
La UEFA ha uss pretendi, suenter ina sesida extraordinaria a Varsovia/Warschau, che las elecziuns per il presidi da la FIFA vegnian spustadas.
Las arrestaziuns da la mesemna en damaun
Ils funcziunaris èn vegnids arrestads la mesemna las 6 la damaun en l’hotel «Baur au Lac» a Turitg. La polizia ha arrestà els per incumbensa da l'Uffizi federal da giustia. Uss sa chattan els en arrest d’extradiziun. Sco l'uffizi communitgescha, hajan ils Stadis Unids da l’America dumandà las arrestaziuns.
Arrestads refusan extradiziun
Sis dals set arrestads refusan l’extradiziun en ils Stadis Unids. Ils Stadis Unids ston uss pia far la dumonda uffiziala a las autoritads svizras. Per quai han els peda 40 dis. Uschespert che quellas dumondas èn fatgas cuntinuescha la procedura d’extradiziun. Quella dat l’Uffizi federal per giustia.
Quai èn las inculpaziuns
Cunter ils funcziunaris da la Federaziun da ballape internaziunala Fifa vegn investigà a New York, tranter auter pervi da corrupziun. Els duain avair acceptà pajaments da medias da sport e d’interpresas che commerzialiseschan il sport. Sco cunterprestaziun hajan quels survegnì dretgs da medias e da sponsoring tar turniers da ballape en l'America dal sid ed en ils Stadis Unids. «Oz mussain nus la carta cotschna a la Fifa.» Quai ha ditg il president da las autoritads fiscalas Richard Weber. I saja in bun di per il ballape mo in nausch per quels che maldovran il sport per s’enritgir persunalmain.
Tenor l’Uffizi federal da giustia sa tracti da pajaments da passa 150 milliuns dollars, succedids dals onns 90 enfin ussa.
