L'onn passà ha la polizia federala Fedpol registrà in ferm augment d'annunzias pervi dal suspect da lavada da daners. Era davart la finanziaziun da terrorissem e la criminalitad en la rait hai dà dapli annunzias, quai è da leger en il rapport annual da la Fedpol.
Il 2015 hai ella survegnì en tut 2'400 annunzias pervi da lavada da daners, in terz dapli che l'onn avant. En total vai per ina summa da 4,8 milliardas francs. Per l'emprima giada hai dà dapli cas da corrupziun che da cugliunaria.
Daners da terrorissem en il focus
Davart la finanziaziun da terrorissem ha la Fedpol registrà l’onn passà 38 annunzias (2014: 9). La summa totala munta a 32 milliuns francs. Suenter ils attentats a Paris hajan la polizia federala rinforzà la collavuraziun e coordinaziun cun partenaris aifer la Svizra ed en l’exteriur. L’onn 2015 èn vegnids ordinads 17 scumonds d’immigraziun cunter dschihadists.
Record d’annunzias da cyber
In record da delicts hai tenor la Fedpol dà en il champ da criminalitad d’internet. Uschia la l’autoritad survegnì l’onn passà 11’575 annunzias da cuntegns suspectus. 80 pertschient da quellas annunzias eran davart acts punibels. Ils blers cas èn da quels da phishing. Quai munta che criminals emprovan d’engular datas confidenzialas sco nums d’utilisader e pleds clav per contos d’e-banking.
1’193 cas hai dà davart cuntegns pedosexuals en l’internet. La Fedpol ha tras investigaziuns pudì identifitgar in pedocriminal tudestg ch’aveva era surduvrà uffants ch’abiteschan en Svizra.
RR novitads 15:00