Gia per la dieschavla giada ha la campagna lieu en Svizra. Mintg'onn vegn tematisà in auter aspect da violenza drizzada ad ina schlattaina. Quest onn è la campagna internaziunala stada annunziada per las citads Basilea, Bienna, Genevra, Losanna, Schaffusa, Son Gagl, Turitg e Cuira.
Flashmob a Cuira
A Cuira èn las persunas sa rimnadas sin l'Arcas tar in rudè. Simbolicamain èn lur buccas stadas tatgadas giu. Suenter intginas minutas da silenzi han las persunas prendì davent ils tatgaders. Lura è vegni tschivlà u sbragì slogans.
Mulestas en sortida
Mattas tranter 14 e 19 onns vegnian mulestadas en sortida, pateschian violenza a chasa, sentian discriminaziun tras sexissem ni vegnian restrenschidas tras ideals da bellezza. Uschia la manadra da campagna Christina Klausener. Per prender davent il tabu da tschintschar avertamain davart violenza sexuala è il slogan da quest onn #sprechenwirdarüber.
RR novitads 16:00