Il pli aut refurmà da la Svizra, Gottfried Locher, s'exprima per la lètg per persunas da la medema schlattaina. Envers las gasettas da Tamedia ha il president da la Federaziun da las baselgias evangelicas manegià, ch'el saja da l'opiniun che la lètg duaja valair er per pèrs da medema schlattaina. La baselgia duaja suandar al stadi e s'avrir per in nov consens social.
Per ils refurmads na saja la lètg betg ina dumonda fundamentala da la cretta. Sch'il stadi s'avria envers la lètg per tuts, na vesia el nagin motiv, pertge che la baselgia refurmada na duess betg suandar.
Enfin uss n'han las Baselgias refurmadas chantunalas betg formulà ina parola davart la lètg tranter persunas omosexualas. L'entschatta november vulan las baselgias a chaschun da la radunanza da delegads decider ina posiziun.
RR novitads 10:00