Il Cussegl federal ha bandunà la chasa federala. Per sia sesida emnila dad oz mesemna è il Cussegl federal ì en il chantun Lucerna. D'in apero en il Museum Svizzer da Transports a Lucerna s'inscuntra el era cun la populaziun. Tals inscunters e barats sajan pli impurtants ch'insacura, ha ditg il president da la confederaziun, Guy Parmelin. Ins stoppia crear bunas relaziuns tar ils chantuns.
Suenter sia seduta è il Cussegl federal s'inscuntrà a l'apero cun las autoritads lucernaisas e cun la populaziun. Ed il president da la Confederaziun, Guy Parmelin, ha sulet duvrà paucas secundas per conquistar ils cors dals indigens preschents. El ha duvrà il pled lucernais «rüüdig» per fitg ed il glatsch è stà rut. Quest apero saja in ulteriur pass envers la normalitad, ha Parmelin ditg. Il medem mument han var 100 adversaris da la politica da corona demonstrà davant il museum.
«Extra muros»
Igl è la 15avla giada ch'il Cussegl federal sa scuntra «extra muros», pia ordaifer la chasa federala. El ha gia vulì ir in onn avant a Lucerna, pervia da la pandemia n'è quai dentant betg stà pussaivel. L'idea da s'inscuntrar en la Scol'auta da musica a Kriens saja vegnida da cussegliera federala Simonetta Sommaruga. Ella era sa scoladà là sco pianista. Forsa dettia ina seduta en armonia.
