Dapi mez settember sa sbassan las cifras d'infecziun cun il coronavirus en Svizra. Actualmain sa movan quellas tranter 1'500 e 2'000 cas per di, communitgescha l'Uffizi federal da sanadad. Las pli bleras infecziuns dettia tar uffants e giuvenils, uschia han ditg ils experts dal BAG avant las medias. Er tar las ospitalisaziuns van las cifras enavos. Nagina distgargia dettia dentant anc sin las staziuns intensivas. Quai er sche la cifra saja ida levet enavos ils ultims dis, uschia ha declerà Patrick Mathys da l'Uffizi federal da sanadad. Ils experts quintan er cun in augment da cas en vista la stagiun d'atun e d'enviern.
Ultra da quai creschia la cadenza da vaccinar memia plaun per che la situaziun en Svizra sa quieteschia, concludan ils experts vinavant.
Certificat sin pista dapenda tut da la situaziun
Er l'obligatori da certificat sin pista è stà tema a la conferenza da medias. Tenor Patrick Mathys pudess quel far senn sche la situaziun è tendida, cunquai che il territori da skis saja ina massa fitg omogena che sa mova en pendicularas, ustarias e bars. I na fetschia uss dentant betg senn da discutar sur d'ina tala mesira, cunquai ch'ins na sappia betg co la situaziun guardia lura or il december.
