- Il dumber da novas infecziuns en Svizra surpassa cleramain quel dals pajais vischins.
- I vala uss dad evitar contacts betg necessaris.
- Adina dapli persunas ston vegnir ospitalisadas pervi da Covid-19.
- Il squitsch sin il persunal da tgira crescha.
- La capacitad da testar vegn als cunfins.
Sin la dumonda d'in schurnalist, schebain las mesiras actualas per evitar la derasaziun dal coronavirus tanschian, ha Martin Ackermann, il schef da la task force scientifica, respundì: «Na, nus essan da la persvasiun che quellas na tanschan per bler betg.» Diesch persunas infecteschian il mument 16 autras persunas e quai saja memia bler ed i saja uss da reagir immediat per reducir il dumber da novas infecziuns.
Cleramain surpassà ils pajais vischins
Aifer in'emna saja il dumber da novas infecziuns cun il coronavirus pli che sa dublegià. La situaziun saja fitg severa, ha ditg Stefan Kuster da l'Uffizi federal da sanada BAG il venderdi davant las medias da la Chasa federala.
Las cifras en Svizra sajan per exempel tschintg giadas uschè autas sco quellas en Germania. En egl dettia er che la quota da tests positivs saja sur 20% – passa mintga tschintgavel test è pia positiv. Tant pli saja uss da sa tegnair vid las reglas, ha ditg Stefan Kuster.
Nus stuain evitar contacts betg necessaris.
Pertutgads da novas infecziuns èn tenor Kuster vinavant persunas da tut las vegliadetgnas. Surtut la curva da persunas sur 80 onns creschia fermamain. Er sajan tut las regiuns pertutgadas da l'augment d'infecziuns. L'incidenza da 14 dis varieschia da 190 infecziuns sin 100'000 abitants fin a 1'100 infecziuns per 100'000 abitants.
Adina dapli ospitalisaziuns pervi da Covid-19
Andreas Stettbacher, il delegà da la Confederaziun per il servetsch sanitar coordinà, ha fatg attent sur da l'occupaziun dals letgs en ils ospitals. Il venderdi curt avant las 11:00 era la situaziun la suandanta: Dals 22'239 letgs acuts en ils ospitals eran 16'719 occupads – 710 da quels cun pazients da Covid-19. 5'520 letgs hajan ins uschia anc sin reserva.
Ils ultims dis saja dentant il dumber da pazients da Covid sin staziuns regularas ed intensivas creschì per in factur dad 1,6. Il mardi era quest factur anc tar 1,5.
Las pretensiuns al persunal da tgira creschan
I saja uss da far attenziun ch'il persunal da tgira na vegnia betg en in stadi general d'exauriment, ha avertì Andreas Stettbacher. Ins saja conscient ch'il squitsch sin il persunal da las staziuns intensivas saja spezialmain grond.
Tar las indicaziuns da capacitads da letgs dad ospitals saja mintgamai er resguardà il persunal ch'i dovria, ha ditg Stettbacher.
Capacitad da testar vegn als cunfins
Cun il ferm augment dals novs cas da corona, vegnia la capacitad da testar en Svizra plaunet a ses cunfins. Sch'i giaja uschia vinavant, lura na tenschia la capacitad bainbaud betg pli, ha ditg Stefan Kuster. La situaziun saja tendida ed i saja uss necessari da schlargiar la capacitad da far tests. I giaja qua per ils sets da test sezs, capacitads da labor sco er capacitads medicinalas.
