ETH Turitg – nagins raps pli per il rumantsch

Il rumantsch a l’Universitad da Turitg na saja dentant betg periclità – di il decan da la facultad filosofica da l’Universitad da Turitg, Andreas Jucker. Il glindesdi a bun’ura era vegnì enconuschent che la scol’auta politecnica ETH da Turitg stritga ses sustegn per il rumantsch a l’Universitad.

Laschar ir video «ETH Turitg stritga contribuziun per il rumantsch»

ETH Turitg stritga contribuziun per il rumantsch

2:55 min, Telesguard dals 5.9.2016

La scol'auta politecnica ETH stritgia sia contribuziun da 100'000 francs per motivs da spargn - uschia il decan Andreas Jucker vinavant. Quella summa aveva la ETH pajà annualmain a l'Universitad da Turitg - e quai durant passa 30 onns.

Il Rumantsch saja fitg impurtant

Tenor Andreas Jucker saja il rumantsch però fitg impurtant ed ins vegnia a chattar ina soluziun per salvar il rumantsch a l'universitad.

Cun quai ch'il rom rumantsch vegniva instruì uriundamain a tuttas duas scolas autas sustegneva la ETH l’Universitad da Turitg cun pajar per la plazza dal prim-assistent.

Temp per chattar ina finanziaziun

Malgrà ch'il professer da Rumantsch, Clà Riatsch, va en pensiun gia la fin dal 2017, pajass la ETH anc in onn dapli, scriva la gasetta Tages-Anzeiger. La ETH veglia dar a l'Uni da Turitg dapli temp per chattar ina nova furma da finanziaziun, scriva il Tagi vinavant.

Portrait Martin Jäger.

Legenda da maletgs: Martin Jäger, directur da l'educaziun (GR/PS). RTR

«  Jau sun surprais da la decisiun da l’ETH. Tenor mai è quella obliada da sustegnair il seminari rumantsch da l’universitad a Turitg. »

Martin Jäger
directur da l'educaziun (GR/PS)

La scola politecnica federala da Turitg stritga ses sustegn finanzial per la fin dal 2018.

In ferm segn

Ils 100’000 francs che l’ETH stritga a l’universitad a Turitg per il seminari rumantsch saja in ferm segn, uschia declera Johannes Flury, il president da la Lia Rumantscha.

Johannes Flury, chavels grischs, barba, spieghel.

Legenda da maletgs: Johannes Flury, president da la Lia Rumantscha. RTR, Gion Hosang

«  Jau speresch ch’els tegnian en quai ch’els han ditg fin ussa, ch’els na veglian betg stritgar questa mesa plazza, ma nus stuain cumbatter per quai. »

Johannes Flury
president Lia Rumantscha

L’universitad da Turitg è spezialisada sin la litteratura rumantscha e l’universitad da Friburg sin la linguistica. Uschia ha mintga universitad sias prioritads e mintgina in’autra offerta. Ils professurs da Rumantsch, Clà Riatsch a Turitg e Matthias Grünert a Friburg, profiteschan da lur fermezzas. Perquai fan els era in barat.

Quai vul dir; Clà Riatsch instruescha a Friburg litteratura e Matthias Grünert a Turitg linguistica. Ina soluziun che duess era vegnir mantegnida en l’avegnir, vul dir davent da l’onn proxim cura che Clà Riatsch va en pensiun. Perquai duessi dar tenor la Lia Rumantscha ed il chantun Grischun in contract tranter las universitads ed il Grischun per mantegnair la diversitad dals seminaris.

Prof. Dr. Andreas H. Jucker, decan a l'ETH Turitg.

Legenda da maletgs: Prof. Dr. Andreas H. Jucker, decan da l'universitad da Turitg. mad

«  Ils 100’000 francs n’èn per l’universitad nagin problem da remplazzar. Ed il rumantsch è in punct impurtant che nus vulain er mantegnair en l’avegnir. »

Prof. Dr. Andreas H. Jucker
decan da l’universitad da Turitg

RR novitads 08:00++