Siglir tar il cuntegn
Inhalt

Svizra ETH tranter las meglras 20 scolas autas dal mund

En la rangaziun da las meglras scolas autas dal mund figureschan gist quatter scolas autas svizras tranter las 100 meglras. La meglra scol’auta svizra è la ETH da Turitg sin plazza 19. Ella è uschia era la meglra scol’auta da l'Europa continentala.

La Scola politecnica federala a Turitg.
Legenda: La Scola politecnica federala a Turitg resta la meglra scol'auta sin il continent da l'Europa. Keystone

En il «Ranking da Shanghai» da las meglras scolas autas dal mund, èn sper las duas ETHs era l’universitad da Genevra e Turitg tranter las meglras 100 dal mund. La Scola politecnica federala da Turitg (ETHZ) è dentant la meglra scol’auta cun plazza 19. Ella resta cunquai la meglra scol’auta da l’Europa continentala.

L'universitad da Genevra sa chatta sin plazza 53, l'universitad da Turitg sin 54 e l'ETH Losanna sin il 92avel plaz. Per l’universitad da Basilea n’hai per l’emprima giada betg tanschì tranter las 100 meglras dal mund.

Universitads americanas domineschan

Sco era tar autras rangaziuns da scolas autas, domineschan tar quella dal «Ranking da Shanghai» las scolas autas dals Stadis Unids da l’America. Tranter las 20 meglras scolas autas dal mund èn 15 instituts americans, cun Harvard a la testa.

Las suletas universitads betg-americanas tranter las top 20 èn sper la ETHZ (19), las universitads da Cambridge (4) ed Oxford (7), l'University College London da l'Engalterra (17) e l'universitad da Tokyo (20).

RR novitads 16:00