Siglir tar il cuntegn
Inhalt

Svizra Eroport da Turitg sa retira da sias fatschentas en l'India

La societad acziunaria da l'eroport da Turitg venda sia participaziun vi da l'eroport internaziunal a Bangalore.

Eroport internaziunal a Bangalore (India) - pliras persunas stattan davant la tavla che mussa la partenza dals sgols
Legenda: La societad d'aczias da l'eroport da Turitg venda sias aczias da l'eroport a Bangalore Keystone

La gestiunaria da l'eroport da Turitg era participada cun 5% a l'eroport internaziunal a Bangalore. Uss venda ella questa participaziun a la holding d'investment canadaisa Fairfax. Il pretsch da vendita per il pachet d'aczias munta a 48,9 milliuns dollars.

Naginas fatschentas pli en l'India

Gia il 2009 aveva la societad d'aczias da l'eroport da Turitg vendì per 100 milliuns dollars ina participaziun da 12%. Entras la vendita actuala n'ha la societad d'eroport naginas participaziuns pli en l'India.

Investiziuns dapi 15 onns

Fatg il pass en l'India aveva l'eroport da Turitg l'onn 2001. Lura era la societad vegnida tschernida sco gestiunaria ed investidra per la construcziun ed il manaschi dal nov eroport intercontinental a Bangalore. Ella aveva investì 15 milliuns dollars ed era stada participada activamain a la construcziun ed organisaziun dal nov eroport. Ils emprims dus schefs da l'eroport a Bangalore eran Svizzers. Dapi l'onn 2010 ha in indigen surpiglià la batgetta.

Contract da gestiunari scadì

Dapi ch'il contract da gestiunari da la societad d'aczias da l'eroport da Turitg saja scadì l'onn passà haja Turitg in'autra rolla en questa fatschenta. La societad saja mo anc ina minoritad d'aczias a Bangalore e perquai veglia ella uss vender la participaziun, ha ditg la pledadra da l'eroport da Turitg.

RR novitads 9:00