Siglir tar il cuntegn

Svizra Eroport da Basila vul reducir canera d'aviuns

L’eroport Basel-Mülhausen vul reducir la grevezza da canera en las vischnancas pertutgadas. I saja necessari da reagir sin la situaziun actuala, Quai ha communitgà il gestiunari da l’eroport internaziunal.

L'eroport da Basel-Mülhausen.
Legenda: L'eroport da Basel-Mülhausen renconuscha «in basegn d'agir sin la situaziun da canera», oravant tut tranter las 23:00 uras e mesanotg. Keystone

Cunzunt giaja per il temp tranter las indesch e mesanotg. Fin la fin da l’auter onn duai il dumber da partenzas vegnir reducì per la mesadad durant quest’ura. D’augmentar il scumond da sgular la notg da las indesch la saira enfin las sis la damaun, na saja però betg planisà. In tal scumond datti a la plazza aviatica da Turitg.

Sche insaco pussaivel na vul l'eroport nagins sgols suenter las 23:00.
Autur: Matthias Suhrdirectur EuroAirport

La mira saja da reducir marcant la canera en las vischnancas vischinantas. Quai na dastgia dentant betg periclitar l'impurtanza economia publica da l'eroport da Basilea. Dals 6'400 emploiads abiteschian 19% en Svizra e 75% en l'Alsazia. Gia en il plan da stad 2018 sajan blers sgols vegnids spustads.

L'EuroAirport quinta cun in creschament cuntinuant tar la fatschenta da passagiers, vitgira aviatica, vitgira express. Perquai ston era ils stabiliments vegnir schlargiads. Fin 2030 pudess il dumber da passagiers s'augmentar da 8,4 milliuns il 2017 sin 11 fis 13 milliuns. La vitgira aviatica pudess schizunt sa dublegiar.

RR novitads 18:00