Siglir tar il cuntegn
Inhalt

Svizra Er il grip sut la deponia da rument spezial Kölliken è contaminà

Sut la deponia da rument spezial a Kölliken (AG) è il tissi da ruments entrà pli profund en il grip che supponì fin qua. La deponia cuntegna il pli grond quantum da rument chemic vegl en Svizra, sco radio SRF rapporta. Perquai ston ins dustar var 30’000 tonnas grip or dal profund.

La halla da demontascha a Kölliken.
Legenda: Cun stgavar pli bass crescha il privel, che la halla da demontascha pudess crudar ensemen. Keystone

Fin uss deva quai ina gronda dumonda areguard la sanaziun da la deponia a Kölliken (AG): Quant profund è il tissi penetrà en il grip? Uss datti ina resposta: numnadamain plirs meters profund.

La halla da ruments spezials a Kölliken.
Legenda: Tranter 1978 e 1985 èn vegnids deponids 250'000 m3 ruments spezials. Dapi il 1985 vegn la deponia sanada. Keystone

Crap da sablun è spezialmain permeabel

Atgnamein han ins supponì che circa 1 meter dal terren da la deponia a Kölliken sto vegnir allontanà. Radund 200 sondagis mussan dentant in auter maletg. Tenor il manader da fatschenta da la deponia da rument spezial Benjamin Müller ston ins chavar pli profund. Percunter èn pertutgads be 20% da l’entira surfatscha.

En tschertas parts è il grip praticamain restà serrà. En auters lieus datti ina contaminaziun fin ina profunditad da 5 meters. Pertutgadas èn cunzunt parts cun crap da sablun. Sco Müller declera, ha il grip en quels lieus survegnì ina colur naira; atgnamain duess el esser brin.

Pli profund fiss problematic

In auter problem è la statica da la halla da demontascha. Ins na dastga numnadamain betg exchavar pli profund che 5 meters, uschiglio pudess la halla crudar ensemen. Sch’il grip fiss contaminà pli profund, lura stuess el vegnir sanà pli tard. Ina pussaivladad fiss d’emplenir il foss cun terratsch, da demontar la halla e da suenter exchavar il grip contaminà cun agid da perfuradas.

RR novitads 08:00