Siglir tar il cuntegn

Svizra Entusiassem en la pressa tessinaisa suenter l'elecziun da Cassis

In di suenter l'elecziun dal nov cusseglier federal Ignazio Cassis è sia elecziun vegnida recepida differentamain en las gasettas. En il Tessin ed en la Svizra tudestga èn las reacziuns entusiasticas. Las gasettas da la Svizra franzosa deploreschan dentant la mancanza da curaschi dals parlamentaris.

Ignazio Cassis cun baluns cotschens e blaus.
Legenda: Il Tessin sa legra per ses nov cusseglier federal. Keystone

Il Corriere della Ticino titulescha curt: «Il Ticino torna in Consiglio federale». Ils Tessinais sa legran che che la Svizra ha suenter 18 onns puspè in Cussegl federal che represchenta tut las regiuns da la Svizra.

Ed er las medias svizras tudestgas commenteschan l'elecziun da Cassis cun entusiassem. Il Blick online scriva, ch'il Cussegl federal consistia uss da quatter Svizzers tudestgs, da dus Romands ed in Tessinais, quai saja perfetg. La Neue Zürcher Zeitung lauda sin la pagina d'internet l'elecziun sco raschunaivla. L'Assamblea federala haja demussà responsabladad statala e politica. Era il Tages-Anzeiger ed il Bund scrivan ch'i saja necessari, ch'ina naziun mussia er da temp en temp ch'il resguard per minoritads saja impurtant.

En Svizra franzosa deploreschan per exempel il Journal du Jura u er Le Temps che nagin da lur regiun saja vegnì elegì en il Cussegl federal. L'Assamblea federala saja stada memia pauc curaschusa. Pierre Maudet fiss tenor il Journal du Jura stà il meglier candidat per la funcziun.

RR actualitad 06:00