Schebain ord vista dals requirents d'asil sco er ord vista dals collavuraturs en il sectur da tgira è l'engaschament da spirituals muslims en ils centers d'asil in gudogn. Perquai vegn il project da pilot prolungà fin la fin zercladur 2018. Quai ha il Secretari da stadi per la migraziun (SEM) communitgà.
Per l'ina possian ils spirituals muslims construir punts tranter las culturas. E per l'autra possian els intermediar l'Islam a moda ch'el vegnia chapì.
Extender il project
Dapi il prim da zercladur 2016 han ins engaschà spirituals da l'Assoziaziun dad organisaziuns islamicas da Turitg (VIOZ) en centers d'asil federals. Ils spirituals da la VIOZ hajan sa cumprovà. Per ch'ins possia dentant extender il project sin auters centers d'asil federals stoppian ins engaschar ulteriuras organisaziuns muslimas.
Er la scolaziun dals spirituals muslims stoppa sa meglierar. Il SEM propona d'introducir ina scolaziun specifica per spirituals muslims. Tar quella duain ins metter il focus sin tgira spirituala, la relaziun da baselgia e stadi e sin las relaziuns tranter religiuns.
Finanziaziun averta
Sco ch'ins veglia finanziar la tgira da spirituals muslims en centers d'asil federals saja dentant anc avert. Ils custs per spirituals cristians surpiglian las baselgias chantunalas. Las organisaziuns muslimas han dentant declerà ch'ellas n'hajan betg la capacitad per surpigliar ils custs.
RR novitads 10:00