Siglir tar il cuntegn
Inhalt

Svizra Energia solara dovra pazienzia...

Persunas che vulan retschaiver subvenziuns per indrizs solars ston a partir da l'auter onn betg pli spetgar mais, mabain onns. Per dumondas per indrizs pli pitschens stoppian ins quintar cun almain dus onns e mez – per indrizs gronds schizunt sis onns.

Indriz solar.
Legenda: Era indrizs gronds vegnan ussa subvenziunads. Keystone

La raschun è che bler dapli indrizs e bler pli gronds indrizs possian profitar da la bunificaziun unica. Perquai stoppian ins quintar cun pli lungs temps da spetga, ha la pledadra da l'Uffizi federal per energia (BFE) ditg a Radio SRF.

La basa per la midada è la nova strategia d'energia ch'è vegnida approvada dal pievel il matg cun 58%. Questa prevesa totalmain dapli sustegn finanzial tras il stadi per projects solars. Davent da l'emprim da december datti per indrizs pitschens mo pli ina bunificaziun unica da 30% dals custs d'investiziun. Dentant pon era possessurs da gronds indrizs inoltrar ina bunificaziun.

Betg mo l'energia solara vegn promovida

La promoziun che vegn era da bun a l'energia d'aua, da vent, a la geotermia ed a la biomassa, vegn finanziada entras supplements da la rait. Quels midan dad 1,5 raps per kwh sin 2,3 raps per kwh. Cun questas entradas supplementaras resultan 480 milliuns francs per il sustegn d'energias regenerablas.

RR novitads 12:00