Siglir tar il cuntegn

Header

Navigaziun

spina da contact verda, davos in scrit «Ihre Stromkosten»
Legenda: Ils custs per l'electrizitad s'augmentan, sulet quai è franc. Keystone
cuntegn

Svizra Energia: la fin paja il consument

L’Uffizi federal d’energia ha preschentà novas propostas per garantir il provediment d’electricitad era suenter il 2020. Il pachet da leschas intitulà «strategia d'energia 2050» na tanscha betg per che la Svizra dumogna la sortida da l'energia atomara.

I dovra ina segunda etappa. Ils plans fin ussa (p.ex. taxa directiva) han fatg naufragi en il parlament. Las novas ideas che la Confederaziun preschentan en il rapport pudessen custar ils consuments fin 1,5 milliardas francs mintg'onn.

Actualmain paja la populaziun svizra mintg'onn 10 milliardas francs per l’electricitad. Avair avunda electricitad na dettia betg gratuit, quai di Beat Goldstein da l'Uffizi federal d'energia. La finala stoppia il consument pajar per garantir la producziun d'electricitad.

3 propostas realisticas

Ch'il consument è responsabel per la finanziaziun vegn er cler en in nov rapport da l'Uffizi federal d'energia. Là vegn tranter auter dumandà danunder che l'energia duai vegnir en l'avegnir. L'uffizi skizzescha trais variantas che fissan pussaivlas e realisablas:

  • Aucziuns: il stadi scriv'ora ina tscherta quantitad current electric (p.ex. electricitad dal sulegl). Tgi ch'offrescha il pli bunmartgà po furnir.
  • Quotas: Tut ils producents d'energia han da furnir ina quota fixa d'energia regenerabla.
  • Reservas da capacitad: Per ch'i dettia adina avunda energia ston las ovras electricas adina avair reservas da current electric e survegnan persuenter daners.

Pli char vegnissan en spezial las quotas, pli bunmartgadas las aucziuns. Sortir da l'energia nucleara saja da dumagnar cumplettamain cun cumbinar a moda intelligenta questas ed autras ideas. Co exact sto decider la politica.

RR novitads 08:00