Siglir tar il cuntegn

Svizra En las praschuns èsi pli pauc stretg ch'era schon

La quota d'occupaziun en las praschuns svizras è sa sminuida ils ultims onns cumpareglià cun il record dal 2012. En media èn las praschuns svizras occupadas per 92,5%, quai communitgescha l'Uffizi federal da statistica.

Purtret d'ina praschun en Svizra.
Legenda: Las praschuns en Svizra n'èn betg pli uschè plainas sco era schon. Keystone

En intginas praschuns saja la situaziun anc adina tendida, scriva l'uffizi. En la Svizra latina, vul dir en il Tessin e la Svizra franzosa, sajan las praschuns suroccupadas, quai cun ina quota da 107%. En la Svizra orientala èn las praschuns occupadas per 80%.

Perquai er differenta, è stada la rata dad arrestads sin 100'000 abitantas ed abitants. En la Svizra latina èn 109 persunas vegnidas arrestadas sin 100'000 abitants, en la Svizra centrala e dal nordvest 68 ed en la Svizra orientala 71. Sur l'entira Svizra è la rata tar 81. En tut èn 6'863 creschids stads en praschun, quai è 1% pli pauc che l'onn avant.

Instituziuns empè da famiglias da tgira

Il di da referenza ils 6 da settember 2017, èn 477 giuvenils stads plazzads ordaifer lur famiglia suenter avair fatg in delict. Quai èn 1,5% dapli che l'onn avant. 249 da quels giuvenils n'èn anc betg stads sentenziads.

La gronda part dals giuvenils han vivì en instituziuns spezialas. Ferm enavos va tenor l'uffizi federal il dumber da giuvenils che vegnan en famiglias da tgira. Anc tschintg giuvenils che han commess in delict èn vegnids plazzads tar famiglias. Il 2010 eran quai anc 77.

RR novitads 12:00