Tar las votaziuns finalas dad oz han il Cussegl naziunal ed il Cussegl dals chantuns approvà 16 fatschentas. Il parlament ha approvà tranter auter la cunvegna da clima da Paris, 100 milliuns francs per canortas e prolungà per quatter onns il moratori davart la tecnica genetica. Cunter tut las fatschentas po ussa vegnir fatg in referendum.
Las surpraisas
La sessiun da stad è stada ina sessiun plitost quieta, dentant hai dà ina ni l'autra surpraisa. Fatg surstar tuts ha il cusseglier federal Didier Burkhalter cun sia demissiun. Nagin vess pensà che el na vul betg pli.
Cun quai è il punct culminant per la sessiun d’atun gia cler. Ils 20 da settember vegn tschernì inA novA CusseglierA federalA.
La segunda surpraisa era il rapport rumantsch dal cusseglier naziunal Martin Candinas. Per l'emprima giada ha in parlamentari fatg in rapport dal tuttafatg per rumantsch. I sa tracta dal rapport da la cumissiun da surveglianza da la NEAT.
Las reacziuns or dal parlament sin il rapport rumantsch eran positivas. I saja stà ina bun'occasin da metter in signal ch'i dat era anc il rumantsch.
Ils temas dominants
Per il Grischun era la discussiun enturn ils tschains d'aua ina da las pli interessantas. La cumissiun responsabla vuleva mesiras d'urgenza per las ovras idraulicas.
Ils consuments duain vegnir sfurzads da cumprar e duvrar energia dad ovras idraulicas. Ma l’idea n'e betg vegnida beneventada dal cussegl naziunal. La cumissiun sto uss anc ina giada far propostas.
In auter tema che pertutga il Grischun è l' imposta sin la plivalur per l’hotellaria. Là vala ina imposta speziala da 3.8 %. Quai pervi da la situaziun main buna per il turissem per exempel pervi dal ferm franc svizzer.
L’imposta speziala e vegnida prolungada per ulteriurs 10 onns. Uschia saja quai pussaivel per ils hoteliers da planisar a lungia vista.
En general han dumondas d'energia dominà. Era la cunvegna da clima da Paris.
Suenter ch'il Cussegl naziunal ha ratifitgà la cunvegna è era seguì il Cussegl dals chantuns. Cun quai fa la Svizra ses pussaivel per che la temperatura mundiala na sa sauzia betg per dapli che dus grads. Co che las mesiras concretas vegnan a vesair ora n'e anc betg discussiunà.
RR actualitad 12:10