Siglir tar il cuntegn

Header

cuntegn

Svizra En futur fan roboters nossa lavur

Roboters conquistan il mund da lavur. In studi ch'il forum mundial d'economia WEF ha publitgà fa ina prognosa plitost stgira. Uschia vegnan ils proxims 5 onns 5 milliuns plazzas remplazzadas cun roboters.

Sco il studi ch'il forum mundial d'economia WEF mussà èn duas terzas da las plazzas che van a perder en las spartas biro ed administraziun e betg en las fabricas. La lavur en bleras fabricas è gia oz automatisada. Las maschinas surpiglia gia oz pliras lavurs da rutina. Il rapport mussa era che bleras plazzas vegnan stuschadas cun las consequenzas las pli negativas en il sectur da sanadad.

Las grondas perdentas sajan las dunnas, perquai che las bleras plazzas sajan en segments cun in pitschen creschen ni en secturs da distribuziun, biro e rollas administrativas, scriva il studi dal WEF.

Betg periclitadas sajan plazzas en ils segments da la scienza natirala da la IT, ma gist en questas professiuns saja la quota da dunnas plitost bassa.

Ma quai è era ina schanza

Ils roboters vegnan a stgaffir dapli effizienza e dapli productivitad, ha ditg il schef da l’interpresa svizra ABB Ulrich Spiesshofer. Pessimissem na saja dentant betg el dretg lieu. La tema avant roboters saja veglia ma nungiustifitgada, ha ditg Spiesshofer. Sche nus restain innovativs alura pudain nus mantegnair las plazzas da lavur.

Sche nus restain innovativs alura pudain nus mantegnair las plazzas da lavur.
Autur: Ulrich Spiesshofer CEO ABB

Tenor l’associaziun d’industria Swissmem è la Svizra pinada bain sin ils svilups tecnologics dal futur. Gist quest svilup avria interessantas perspectivas, uschia possia la productivitad vegnir auzada, innovativs products vegnir creads sco er novs models da fatschenta, scriva Swissmem en ina communicaziun a las medias.

Il studi ch’è vegni fatg per il WEF 2016 sa basa sin enquistas tar top-managers dals 350 pli gronds concerns dal mund. Al WEF han producents da roboters era gì plattafurma per preschentar lur roboters e lur funcziun.

RR novitads 18:00

Artitgels legids il pli savens