En 100 onns quasi nagins glatschers pli

Entaifer ils ultims 166 onns è la mesadad da la surfatscha dals glatschers en Svizra luada. Tenor experts da l’ETH è quai in process che na po betg pli vegnir franà.

Il glatscher dal Silvretta cun in lai pitschen davant.

Legenda da maletgs: Il glatscher dal Silvretta. Keystone

Ils glatschers svizzers na pon betg pli vegnir salvads. Tar questa conclusiun vegnan experts da la scola politecnica federala da Turitg ETH – envers la gasetta Tages-Anzeiger. Era cun ils pli gronds sforzs da reducir las emissiuns da CO2, vegnian 80 fin 90 % dals glatschers a svanir fin l'onn 2100.

Ils glatschers svizzers han cuntanschì lur pli gronda expansiun enturn il 1850. Da quel temp muntava la surfatscha da glatschers a 1735 kilometers quadrat, quai che correspunda exact a la surfatscha dal chantun Turitg. Oz datti mo anc 890 kilometers quadrat glatschers. En 166 onns è pia la mesadad da la surfatscha dals glatschers luada.

Damain glatschers che avant 160 onns

Era il volumen è ì enavos dramaticamain. Ils experts stiman il volumen da glatschers per l'onn 1850 sin circa 130 kilometers cubic. Il 2016 eran quai dentant be anc 54 kilometers cubic, pia quasi 60% pli pauc. Ed era la quantitad è sa sminuida. L'onn 1973 devi anc passa 2'000 glatschers en Svizra. Quella quantitad è sa reducida fin oz sin radund 1'400 glatschers. En vista a las autas temperaturas actualas, vegnia era il 2017 ad esser in schlet onn per ils glatschers.

RR novitads 12:00