Siglir tar il cuntegn
Inhalt

Svizra Emprova da pilot tar repartiziun dals requirents d'asil

Per che requirents d'asil han meglras schanzas sin il martgà da lavur duai in nov algoritmus gidar da reparter ils fugitivs sin ils chantuns. Il secretariat dal stadi per migraziun fa davent da l'atun tests davart ina meglra repartiziun.

Requirent d'asil.
Legenda: Emprova da pilot: Requirents d'asil duain vegnir repartids sin ils chantuns uschia ch'els han meglras schanzas sin il martgà da lavur. Keystone

Il schaner han politologs da la ETH e da l'universitad da Stanford preschentà lur algoritmus per integrar fugitivs sin il martgà da lavur. Gia davent dal settember vul il secretari dal stadi per migraziun SEM far ina emprova da pilot cun 1'000 requirents d'asil. Quai ha il pledader dal secretari confirmà envers l'agentura da novitads SDA suenter in rapport da l'emissiun «10 vor 10».
L'algoritmus propona en tge chantun che mintga requirent d'asil ha la pli gronda schanza da chattar ina plazza da lavur. Sco fin qua vegni la clav da repartiziun tranter ils chantuns er resguardada.

Resultats en dus fin trais onns

L'emprova è concepì uschia, che 1'000 requirents d'asil vegnan repartids tenor criteris sco fin ussa ed ulteriurs 1'000 requirents d'asil tenor il nov algoritmus. La finamira è da chattar ora sch'ils requirents d'asil da la segunda gruppa chattan pli spert lavur ch'ils auters. En general han la Confederaziun ed ils chantuns grond interess, da pudair integrar ils requirents d'asil en il martgà da lavur.

Grond potenzial

En Svizra èn en media suenter trais onns be in terz dals requirents d’asil integrads en il martgà da lavur. Tenor la ETH pudess il dumber dentant vegnir augmentads sin 26%. Il program è vegnì elavurà sin fundament da 10'000 persunas ch’èn gia vegnidas integradas en il martgà da lavur.

RR novitads 12:00