Siglir tar il cuntegn

Svizra Emprima canorta rumantscha a Turitg

A Turitg vegn averta l'emprima canorta rumantscha ordaifer il Grischun l'entschatta da matg. La purschida da l'uniun Canorta Rumantscha Turitg e la Fundaziun GFZ sa drizza a famiglias che vulan pussibilitar a lur uffants pitschens d'emprender e discurrer rumantsch ordaifer l'ambient da la famiglia.

Uffants che tarmaglian en ina canorta.
Legenda: Suenter la fasa da pilot cumenza a partir da l'avust il manaschi ordinari (maletg simbolic). Keystone

La purschida da partenza sa cumpona d'in di rumantsch ad emna mintgamai il glindesdi da las 07:30 fin las 18:00 e possia vegnir amplifitgada en il decurs dal temp e tenor basegn sin dus u plirs dis ad emna, scrivan las duas uniuns.

Fasa da pilot da trais mais

A disposiziun stattan 12,5 plazzas, da quellas maximalmain trais per poppins tranter 3 e 18 mais. La gruppa cun uffants da differenta vegliadetgna vegn tgirada da persunal spezialisà rumantsch.

Il temp dal matg enfin la fin da fanadur 2016 vala sco fasa da pilot. Collavuraturas e collavuraturs vegnian ad introducir ils emprims uffants ed a crear il mintgadi da canorta cun promover il rumantsch. Il medem mument valia da segirar la finanziaziun da la purschida.

Occupada bain il 2016

A partir dal prim d'avust 2016 cumenza il manaschi ordinari. Tenor dumondas da geniturs d'enfin ussa vegnia la purschida dad in di da la Canorta Rumantscha ad esser occupada gia avant la fin dal 2016.

Suenter ch'il manaschi ordinari ha cumenzà, planiseschan ils manaders da far in di da las portas avertas per las medias ed il public interessà. Ulteriuras infurmaziuns communitgeschan l'uniun Canorta Rumantscha Turitg e la Fundaziun GFZ lura a temp inditgà.

RR novitads 08:00