Siglir tar il cuntegn
Inhalt

Svizra Emmi - shopping en ils Stadis Unids

Il pli grond elavuratur da latg en Svizra cumpra la Cowgirl Creamery Corporation en California. Sur dal pretsch da cumpra n’ha datti naginas indicaziuns.

2 vatgas en ina stalla americana.
Legenda: Fitgar pe en California - l’America dal Nord è il martgà internaziunal pli impurtant dad Emmi. Keystone

Emmi cumplettescha sia cumpra en ils Stadis Unids gest anc cun la Tomales Bay Foods. Quai è la societad da commerzi, che tutga tar la Cowgirls Creamery. Cowgirls Creamery fa chaschiel frestg, mez-dir e madir da latg biologic, che vegn producì localmain. La Tomales Bay Foods venda chaschiel da pitschnas chascharias.

L’interpresa che producescha chaschiel Cowgirl Creamery e sia interpresa da negozi han realisà l’onn passà ina svieuta da bun 20 milliuns dollars, communitgescha Emmi. En tut lavuran 95 persunas per l’interpresa americana. La sedia da l’interpresa vegn a restar en California.

Las 2 interpresas èn vegnidas fundadas il 1997 da Sue Conley e Peggy Smith. Ellas presidiavan durant 2 onns l’American Cheese Society. Cun la cumpra spera Emmi da fortifitgar sia posiziun en il sectur da chaschiel spezial, producì perdurablamain. En pli spera Emmi da profitar dal bun num dals Cowgirls en la branscha. L’America dal Nord è il martgà internaziunal pli impurtant dad Emmi.

RR novitads 09:00