Siglir tar il cuntegn
Inhalt

Svizra Emmi crescha – però be grazia ad acquisiziuns

L’elavuratur da latg cun sedia a Lucerna è creschì mo levet l’onn passà. Senza las acquisiziuns da la partiziun americana (Divisions America) avess il concern nudà in minus. Sin nivel dal concern è la svieuta s’augmentada per 1,4% sin 3,26 milliardas francs.

La sedia dad Emmi a Lucerna.
Legenda: La sedia dad Emmi a Lucerna. Keystone

Cunzunt en Svizra ha Emmi fatg damain svieuta. Cun 1,74 milliardas francs è quella sa reducida per 2,9% cumpareglià cun l’onn avant. Sco raschun numna il concern en emprima lingia il turissem da cumpra, ils bass pretschs da latsch internaziunals e dapli imports en Svizra. Quai ha communitgà Emmi.

Il gudogn è s'augmentà per 16,7% sin 140,3 milliuns francs. Il gudogn operativ (EBIT) è s'augmentà per 7,3% sin 202,7 milliuns francs.

Creschì en Europa ed America

Percunter è la svieuta s’augmentada en l’Europa (+6,5%) ed en ils Stadis Unids (+8,5%). Quest resultat saja cunzunt d’attribuir a diversas cumpras al martgà europeic ed american.

Dividenda pli auta

Grazia a questas cifras dal 2016 vul Emmi proponer da sia radunanza generala ils 20 d'avrigl 2017 ina dividenda da 5,90 francs per aczia nominala.

Prognosas 2017

Per l'onn current quinta il concern cun sedia a Lucerna che las svieutas s'augmentian levet – quai malgrà in ambient da martgà difficil, sco quai ch'Emmi scriva.

RR novitads 09:00