Pierin Vincenz ha davent dal 1999 dà gas al timun da la banca Raiffeisen. Ord la pitschna banca da purs haja el fatg ina banca d’affars ipotecars cun bun renum, uschia resumescha il magazin d'economia la carriera da Vincenz. Oz è la Raiffeisen il numer in en las fatschentas dad ipotecas – avant ils dus gigants UBS e la Credit Suisse.
Il desideri da crescher e crescher
Quai na saja dentant betg stà avunda per il banchier grischun, scriva l’emissiun «ECO». Cun il chapital da la banca haja el fatg grondas investiziuns. Uschia ha el per exempel cumprà ina gronda cumpart da la banca privata Wegelin, ch’era curt avant il collaps.
Empruvà da mantegnair il image modest
En la publicitad dentant, uschia «ECO», ha el tgirà il maletg dal banchier modest. Uschia ha el ditg ch’in banchier stoppia er enconuscher cunfins ed adina avair in egl ses clients. Quels sajan en il center e betg la banca u el sez sco persuna.
La Finma investighescha
Sco schef da la Raiffeisen n'è Vincenz betg mo sa concentrà sin fatschentas da banca e derivats, ma ha er cumprà cumparts da societads d'investiziun ed informatica. Suenter ses temp tar la Raiffeisen ha el era cumprà sco um privat cumparts dad almain ina fatschenta. Perquai intercurescha la Surveglianza federala dals martgads da finanzas (Finman), sch’i haja dà interess da conflict en quel connex.
