Vegnan tuttAs reelegidAs? - L'elecziun dal Cussegl federal

Il ticker è a fin

12:43
Quai fissi stà ...

... dal liveticker per las elecziuns dal Cussegl federal 2019. L'attatga dals Verds sin il sez dal cusseglier federal liberaldemocarat Ignazio Cassis ha fatg naufragi. Ed er schi n'ha uschia dà naginas surpraisas, datti tenor noss correspundent Adrian Camartin «pli che avunda» material da discussiun per il temp che suonda.
Ina survista dal di d'elecziun a Berna, reacziuns ed analisas chattais sin rtr.ch, al radio ed era en il Telesguard questa saira a las 17:40 sin SRF 1.
Grazia fitg per l'attenziun ed a revair.
12:35
«Nus Verds eran e restain pronts ...»

Els sajan vinavant pronts da surpigliar responsabladad en la regenza, uschia la presidenta dals Verds e candidata per il Cussegl federal Regula Rytz. Gist en vista al las tematicas dal clima e da las dunnas che hajan occupà durant l'ultim cumbat electoral, l'atun passà.
Il resultat che saja sa mussa oz: Bleras partidas sajan prontas da discussiunar la cumposiziun dal Cussegl federal.

audio
Regula Rytz: «Ils Verds èn vinavant pronts»
ord Actualitad dals 11.12.2019.
laschar ir. Durada: 36 Secundas.
12:28
«Igl è er da discutar davart 9 cusseglierAs federalAs»

Anna Giacometti, la nov-elegida cussegliera naziunala grischuna da la PLD, vesa era ch'igl è da discussiunar la represchentaziun da las partidas en il Cussegl federal. Tenor ella èsi però almain uschè impurtant da resguardar la represchentaziun da regiuns, culturas e linguas sco da resguardar la fermezza da las partidas. Areguard il fatg ch'il segund sez dals liberaldemocrats vegn pli e pli fitg sut squitsch è ella da l'avis ch'i saja er da discussiunar dvart il dumber da cusseglierAs federalAs. Ella vesa la cifra 9 sco pussaivla schliaziun.

audio
Anna Giacometti ponderescha er il dumber da cusseglierAs federalAs
ord Actualitad dals 11.12.2019.
laschar ir. Durada: 1 minuta 38 Secundas.
12:12
«Impurtant è ch'ins ha pudì mantegnair la concordanza»

Per la cussegliera naziunala da la PPS, Magdalena Martullo-Blocher, n'è il sa cuntegnair dal socialdemocrats betg en urden. Quai na giaja betg da simplamain torpedar in cusseglier en uffizi da la PLD. Per discussiuns davart la represchentaziun da las partidas en il Cussegl federal è però er ella averta.

audio
Magdalena Martullo-Blocher davart l'avantmezdi senza surpraisas
ord Actualitad dals 11.12.2019.
laschar ir. Durada: 2 minutas 44 Secundas.
11:48
I dovra la discussiun davart la «furmla magica»

Tenor il cusseglier dal chantuns da la PCD, Stefan Engler, èsi correct che la verda Regula Rytz n'è betg vegnida elegida en il Cussegl federal. Bain saja da discutar davart la represchentaziun da las partidas en il Cussegl federal per l'avegnir, ma betg reeleger cussegliers federals en uffizi na saja betg endretg.
Ils cristiandemocrats èn ina da las partidas che pretenda la discussiun davart la cumposiziun dal Cussegl federal. Lur president Gerhard Pfister ha gia envidà las ulteriuras partidas per in inscunter en chaussa.

audio
Stefan Engler davart reelecziun da Casssis e furmla magica
ord Actualitad dals 11.12.2019.
laschar ir. Durada: 1 minuta 56 Secundas.
11:39
«Ina schanza manchentada»

Uschia vesa il nov cusseglier naziunal grischun da la PS, Jon Pult, il fatg che Regula Rytz n'è betg vegnida reelegida. Gist ord vista grischuna èsi tenor il socialdemocrat pli impurtant dad avair ina buna politica per l'ambient. Quai fiss tenor Jon Pult pli impurtant ch'in cusseglier federal sco Ignazio Cassis che ha percunter ina tscherta sensibilitad per las regiuns talianas e minoritaras.

audio
Intervista cun Jon Pult suenter elecziuns
ord Actualitad dals 11.12.2019.
laschar ir. Durada: 1 minuta 49 Secundas.
11:30
Il vegl e nov Cussegl federal è saramentà

Tut ils cussegliers e cusseglieras federalas elegidas han d'engirar u saramentar da lavurar conscienziusamain e da respectar la constituziun federala.

Legenda: La saramentaziun dal Cussegl federal 2019. Keystone
11:12
Il pli aut resultat per il chanzelier federal ...

... Walter Thurnherr è reelegì cun 219 vuschs.
Quai tar ina maioritad absoluta da 113 vuschs.

Legenda: Il chanzelier federal Walter Thurnherr. El è commember da la PCD. Keystone
11:01
Sco spetgà – 7 x «reelegì»

Legenda: Ils resultats dals set cussegliers e cusseglieras federalas en survista. Grafica RTR
10:51
Karin Keller-Sutter è elegida cun 169 vuschs

L'onn passà tar sia elecziun en il Cussegl federal ha ella survegnì 154 vuschs. Il resultat da la ministra da giustia e polizia da la PLD è mediochers. Quai cun 37 cedels vids e 21 vuschs per il Cusseglier naziunal dal chantun Son Gagl, Marcel Dobler.
Ils experts valeteschan quest resultat sco ils gieus usitads vers la fin da l'elecziun dal Cussegl federal a partir da quel mument cura che nagin n'ha insatge da perder.
- cedels repartids e returnads 244
- cedels vids 37
- cedels nunvalaivels 1
- cedels valaivels 206
- maioritad absoluta 104
audio
Davart carriera politica da Karin Keller-Sutter
ord Actualitad dals 11.12.2019.
laschar ir. Durada: 4 minutas 37 Secundas.
10:34
Resultad da record per Viola Amherd: reelegida cun 218 vuschs

L'actuala ministra da defensiun e sport da la PCD è vegnida reelegida cun in fitg bun resultat da 218 vuschs tar ina maioritad absoluta da 117 vuschs. Igl è il meglier resultat insumma tar ina elecziun dal Cussegl federal. Era quai è tenor ils experts in cler segn ch'ils parlamentaris e las partidas sa tegnan vid la concordanza e la regla da reeleger cusseglierAs federalAs en uffizi.
- cedels repartids 244
- cedels returnads 243
- cedels vids 11
- cedels valaivels 232
audio
Resultat da Viola Amherd e sia carriera politica
ord Actualitad dals 11.12.2019.
laschar ir. Durada: 5 minutas 36 Secundas.
10:25
La «furmla magica» 2:2:2:1

Questa furmla stat per la repartiziun constanta dals sezs en il Cussegl federal. Dal 1959 fin il 2003 avevan la PS, la PCD e la PLD mintgamai dus sezs en la regenza. La PPS aveva in sez. Dapi l’elecziun da Christoph Blocher (PPS) che ha recaltgà il sez da Ruth Metzler (PCD) l’onn 2003 ha la PPS dus sezs e la PCD be in. Quai correspunda meglier al principi da concordanza. Vul dir: ils sezs en il Cussegl federal vegnan repartids tenor la fermezza da las partidas en il parlament.
A las ultimas elecziuns naziunalas ha la Partida verda però pudì recaltgar 21 novs mandats en il parlament (17 en il Cussegl naziunal e 4 en il Cussegl dals chantuns). Quai ha lura er lantschà las discussiuns davart la furmla magica. Tenor la fermezza actuala da las partidas avessan ils Verds il dretg d’in sez sin donn e cust dad in sez liberaldemocratic.
Quest giavisch n'è oz betg vegnì ademplì. La discussiun davart la cumposiziun e la represchentaziun da las partidas en il Cussegl federal vegn però a cuntinuar.

Legenda: La furmla che vegn anc a dar bler da discussiunar en l'avegnir: Tgi duai esser represchentà co en il Cussegl federal? Grafica RTR
10:14
Pli cler che spetgà: Ignazio Cassis è reelegì cun 145 vuschs

La cuntra-candidata uffiziala dals Verds, Regula Rytz, ha survegnì 82 vuschs. Uschia è il giavisch dals Verds per in sez en il Cussegl federal per il mument giud maisa, però betg las discussiuns davart la «furmla magica».
Er l'actual minister per affars exteriurs da la PLD ha pudì meglierar ses resultat ed uschia defendì ses sez cun success: Il 2015 ha el anc survegnì 125 vuschs.
- cedels repartids e returnads 244
- cedels vids 6
- cedels valaivels 238
- maioritad absoluta 120
audio
Davart carriera politica da Ignazio Cassis
ord Actualitad dals 11.12.2019.
laschar ir. Durada: 2 minutas 26 Secundas.
10:08
Èsi temp per ina cussegliera federala verda?

Las oppiniuns da parlamentaris e parlamentarias grischunas van in ord l'auter.

audio
Bunura: Elecziuns Cussegl federal – Tge spetgan ils parlamentaris grischuns
ord Actualitad dals 11.12.2019.
laschar ir. Durada: 4 minutas 35 Secundas.
10:02
Ussa vegni serius per Ignazio Cassis e Regula Rytz

La presidenta dals Verds è la suletta candidata uffiziala per il Cussegl federal. Ella vul explicitamain attatgar il sez dal liberaldemocrat Ignazio Cassis.
Dapi set onns presidiescha la scolasta ed istoricra la Partida verda svizra. Avant ha ella manà dal 2005 fin il 2012 il departament da construcziun bassa e traffic da la citad da Berna. Dapi il 2011 sesa ella en il Cussegl naziunal ed è commembra da la cumissiun per traffic e telecommunicaziun. Persunalmain è ella vegnida franada mez november suenter ch’ella n’è betg vegnida elegida en il Cussegl dals chantuns. Percunter vul ella ussa recaltgar in sez per ils Verds en il Cussegl federal. Quai suenter che sia partida ha gudagnà 21 novs mandats en il parlament.
Cunquai ch’ella ha però be il sustegn definitiv da sia partida e dals socialdemocrats vegni cun gronda probabilitad stretg per attatgar il sez dal liberaldemocrat Ignazio Cassis. La fracziun dal center cun PCD, la Partida evangelica e la PBD vegn ad eleger per gronda part las cusseglieras e cussegliers en uffizi.
9:55
Il proxim reelegì è Guy Parmelin cun 191 vuschs

Tar ina maioritad absoluta da 103 vuschs è era quai in fitg bun resultat. L'onn 2015 ha l'actual minister d'economia anc survegnì be 138 vuschs.
Tenor ils experts è quai in cler segn che las partidas vulan sa tegnair vid il principi da concordanza e na fan nagins gieus.
- cedels repartids e returnads 244
- cedels vids 39
- cedels nunvalaivels 1
- cedels valaivels 204
audio
Davart carriera politica da Guy Parmelin
ord Actualitad dals 11.12.2019.
laschar ir. Durada: 6 minutas 26 Secundas.
9:45
Cussegl federal – il quiz

Per tut quels che n'èn anc betg propi en tempra d'elecziuns avain in pitschen quiz davart la regenza svizra. Resposta dattan il cusseglier dals chantuns Stefan Engler (PCD), la nov elegida cussegliera naziunala Sandra Locher-Benguerel (PS) ed il cusseglier dals chantuns Martin Schmid (PLD). Essas megliers u menders ch'ils parlamentaris?
(PS: Deplorablamain hai in pitschen sbagl en il quiz. I manca anc in chantun che n'ha anc mai gì in cusseglier federal u ina cussegliera federala...)

video
Cussegl federal - il QUIZ
Or da Giuventetgna dals 11.12.2019.
laschar ir. Durada: 3 minutas 7 Secundas.
9:38
Er Alain Berset è reelegì cun 214 vuschs

Tar ina maioritad absoluta da 116 vuschs è era quai in fitg bun resultat. Avant 4 onns ha l'actual minister per affars interns da la PS anc survegnì 210 vuschs.
- cedels repartids e returnads 244
- cedels vids 14
- cedels valaivels 230
audio
Davart carriera politica da Alain Berset
ord Actualitad dals 11.12.2019.
laschar ir. Durada: 7 minutas 21 Secundas.
9:20
Simonetta Sommaruga è reelegida cun 192 vuschs

Quai tar ina maioritad absoluta da 110 vuschs. Era quai è in bun resultat. L'onn 2015 aveva la actuala ministra d'ambient, traffic, energia e communicaziun da la PS anc survegnì 182 vuschs.
La candidata verda, Regula Rytz ha survegnì 13 vuschs.
- cedels repartids 244
- cedels returnads 244
- cedels vids 25
- cedels nunvalaivels 1
- cedels valaivels 218
audio
Davart carriera politica da Simonetta Sommaruga
ord Actualitad dals 11.12.2019.
laschar ir. Durada: 5 minutas 41 Secundas.
9:06
Jon Pult è gia in pau frustrà

El n'ha betg il sentiment ch'il resultat da las elecziuns naziunalas midia insatge vid la cumposiziun dal Cussegl federal. Il nov elegì cusseglier naziunal va da quai anor che tutTAs vegnan reelegidAs.

audio
Jon Pult: «Jau sun levamain frustrà.»
ord Actualitad dals 11.12.2019.
laschar ir. Durada: 1 minuta 12 Secundas.