Cun Magdalena Martullo-Blocher e Heinz Brand va la partida populara dal Grischun cun dus anteriurs en il cumbat electoral. Els dus duain defender lur sezs en il cussegl naziunal. E quai cun ils temas usitads da la PPS, quai di Andrea Florin, il manader dal cumbat electoral. La partida vul pia s'engaschar encunter l'immigraziun ed er encunter ulteriuras taxas e taglias. Sin il «tren verd» na vul ella dentant betg siglir si. Sa chapescha hajan ins er ideas tar la strategia d'ambient, la PPS na veglia dentant betg ir cun quellas en il cumbat electoral.
I pudess vegnir stretg
I na vegnia dentant betg simpel da salvar omadus sezs, quai na vesa betg mo Andrea Florin uschia mabain er ils dus candidats principals. Heinz Brand aveva avant quatter onns anc fatg il meglier resultat da tut ils candidats e spera ch'el possia repeter quel. Per Magdalena Martullo-Blocher avevi dentant mo tanschì fitg stretg. Dentant èn els omadus optimists ch'i tanschia er questa giada er sch'i vegnia segiramain grev. Dentant, la finala sajan els uss s'engaschads ils davos quatter onns per il Grischun.
Probabel nagina colliaziun da glistas
Pli probabel er questa giada senza ina colliaziun cun las ulteriuras partidas burgaisas. Tuts trais, il manader dal cumbat electoral ed ils dus candidats, quintan che nagin veglia sa colliar cun la PPS per betg gidar ella da salvar ils dus sezs. Definitiv na saja dentant anc nagut puncto colliaziuns da glistas. Schebain la PPS va uss er anc en il cumbat per il cussegl dals chantuns na leva ella er anc betg tradir, er quai saja anc avert e dependia er tut tenor da colliaziuns pussaivlas. Ins vegnia lura a communitgar sch'i dat l'attatga sin Stefan Engler e Martin Schmid u betg.
RR actualitad 12:00