Siglir tar il cuntegn

Header

cuntegn

Elecziuns federalas 2015 PPS segira en sella - PLD pli ferma, PVL e PBD pli flaivlas

Sche la Svizra avess elegì il parlament mez mars, lura avess la PPS vinavant las pli bleras vuschs cun 26.2%. Cumpareglià cun las elecziuns dal 2011 avess gudagnà la PLD, laschà plimas avessan la PVL e la PBD. Quai resulta da la retschertga da l'institut gfs.bern per la SSR.

PPS vinavant la pli ferma en il parlament

Vinavant las pli bleras vuschs survegn la Partida populara svizra (PPS). Cumpareglià cun l'ultim barometer (october 2014) ha ella pudì augmentar ses dumber d'electurs per 1,6 puncts. Ella è dentant anc adina levamain sut il resultat ch'ella ha fatg a las elecziuns federalas il 2011. Quai possi però anc midar, di il politolog Claude Longchamp da l'institut gfs.ber. «Tar la PPS savain nus che la fasa finala dal cumbat electoral è decisiva. En special la damonda da la mobilisaziun. Là n'è ella anc betg uschè lunsch sco il 2011. Ma quai è era ina da sias fermezzas. E là ha ella anc potenzial. Ella po senz'auter anc augmentar quai dumber da votants.»

PLD fiss la victura

Remartgabel è il resultad dals Liberaldemocrats (PLD). Els han pudì cuntinuar lur trend positiv ed han augmentà lur electorat per 0,5 puncts sin 16,3%. Il meglier resultat dapi las ultimas elecziuns il 2011. Lura aveva la PLD fatg 15,1% da tut las vuschs. Tenor Claude Longchamp ha quai augment duas raschuns:

  • Per l'ina sajan ils commembers fitg motivads per il cumbatt electoral esajan da buna speranza.
  • Per l'autra haja la PLD pudia occupar in dals temas che preoccupa las Svizras ed ils Svizzers il mument - il svilup da l'economia.

Il mument saja la PLD perquai fitg attractiva per quels che vulan midar partida, di Longchamp. «Ditg eran quai las partidas als pols politics, sco la PS ubain la PPS. L'ultima giada eran quai las partidas novas, ils Verd-liberals (PVL) e la Partida burgais-democratica (PBD). Oz è quai la PLD. Ella gudogna en emprima lingia votants da la PVL. Pia quels ch'èn dal maini ch'ils Verd-liberals sajan memia verts e memia pauc liberals. Ed era simpatisants da la PPS midan tar la PLD. Persunas ch'èn dal maini che la PPS haja surfatg cun lur posiziuns radicalas.

PS perdess lev

Pers in mez punct han perencunter ils Socialdemocrats (PS). Cun 19,6% da las vuschs faschessan els dentant anc adina in meglier resultat che avant quatter onns. Lezza giada avevan els survegnì 18,7% da tut las vuschs.

PCD anc adina en il minus

Pudì franar in pau la digren dal dumber da simpatisants ha la Partida cristiandemocratica (PCD). Cun 11.8% avess ella survegnì 0,6 puncts dapli vuschs che avant in mez onn. Quai è però anc adina in mez pertschient damain che tar las elecziuns dal 2011.

PES minus cun tema perdì

Medemamain in mender resultat che avant 4 onns ston ils Verds (PES) nudar. Empè da 8,4% mussa il barometer actual anc 7,5%. Tenor Claude Longchamp hajan ils Verds difficultads da sa posiziunar en il spectrum politic. «Lur tema principal, l'energia atomara, n'ha betg pli la medema muntada sco anc avant paucs onns. Enstagl da quai han ils Verds gudagnà profil cun lur politica da migraziun e dals esters. Ma quai n'è betg il grond tema dals Verds.»

Duscha fraida per PVL

Ina duscha fraida datti per la Partida verd-liberala (PVL). Dapi sia fundaziun il 2007 enconuscheva il dumber da votantas e votants mo ina direcziun: ensi. Da 5,4% il 2011 sin 7,3% en il barometer da l'october passà. Ussa mussa la retschertga mo pli in sustegn da 5,6%. Quai è in minus da 1,7 puncts. Questa midada dal trend na possian ins però betg declerar mo cun il naufragi da lur iniziativa d'energia ils 8 da mars, è Longchamp persvas. «Il tema da la midada sin il sectur da l'energia ha ella pers, perquai che sia posiziun n'è betg acceptabla per la maioritad da la populaziun. La rolla da la partida da speranza ha ella pers, perquai ch'ella ha pers en numerusas votaziuns chantunalas.» La PVL na saja betg anc ina partida dals perdents, ma ella na saja era betg pli la partida carismatica d'antruras, di Longchamp.

PBD vinavant cun trend negativ

La retschertga

Avrir la box Serrar la box

Per il barometer d'elecziuns da la SRG SSR ha l'institut gfs.bern interrogà 2'017 persunas cun dretg da votar en Svizra. Quai tranter ils 11 ed ils 19 da mars 2015. Il sbagl da prova è tar +/- 2,2%.

Betg pudì interrumper il trend negativ ha la Partida burgaisdemocratica (PBD). Cun 4,6% da las vuschs - 0,2 puncts damain ch'avant in mez onn - è ella a la cua da la rangaziun. Il 2011 aveva la partida anc fatg tuttina bleras vuschs sco la PVL, numnadamein 5,4%. Tenor Longchamp ha la PBD in cler problem: la mobilisaziun. «La maioritad dals simpatisants da la PBD na vul betg vuschar per in'autra partida. Els n'èn però betg persvas da sustegnair anc ina giada la partida. Quai è il problem principal, vid il qual la partida sto urgentamain lavurar.» Senza in effort extraordinari da la PBD pudessi era vegnir stretg per il sez da la cussegliera federala Eveline Widmer-Schlumpf, manegia Longchamp.

Artitgels legids il pli savens