Enstagl da Tarzisius Caviezel (PLD) ha il suveran grischun elegì il verd-liberal Josias Gasser en il cussegl naziunal. Gasser ha survegnì 16'123 vuschs. Il terz meglier resultat.
Las pli bleras vuschs hai dà per Hansjörg Hassler (PBD) cun 21'421 vuschs. Quai avant Heinz Brand (PPS) cun 18'581 vuschs. Per la Partida cristiandemocratica (PCD) po Martin Candinas seser en la chombra gronda. El ha survegnì 14'330 vuschs. Danovamain elegida en il cussegl naziunal è la socialdemocrata Silva Semadeni. Ella ha survegnì 13'153 vuschs.
Gasser po engraziar a colliaziun da glistas
Engraziar po Josias Gasser sia elecziun sco cusseglier naziunal a la colliaziun da glistas cun la sanestra.Quella colliaziun da glistas tranter la Partida socialdemocratica (PS), ils verds ed ils verd-liberals ha cuntanschì 26% da las vusch. Gist 1% dapli vuschs (25%) che la colliaziun da glistas da la PPS e da l'Uniun democratica federala (UDF). Là fiss Valérie Favre Accola vegnida elegida en il cussegl naziunal damai ch'ella ha cuntanschì il segund meglier resultat dals candidats da la PPS. La PPS nudava anc dus sez avant che las vuschs da la chapitala Cuira èn vegnidas dumbradas ora.
Terrada per liberaldemocrats
Be guardà sin las partidas ha la Partida burgais-democratica (PBD) cuntanschì il segund meglier resultat: quai cun 20,5% da las vuschs. La PCD vegn sin 16,6% da las vuschs.
Ina terrada hai dà per la Partida liberaldemocratica (PLD). Ella cuntanscha mo 11,9% da las vuschs. Tarzisius Caviezel (PLD) n’è betg pli vegnì reelegì. Quai è l'emprima giada dapi il 1919 che la Partida liberaldemocratica dal Grischun n'è betg pli represchentada en il cussegl naziunal.
Burgais-democrats e verd-liberals gudognan
Las victuras da las elecziuns èn sco sin il nivel naziunal la Partida burgais-democratica (PBD) e la Partida verd-liberala (PVL). La PBD ch’i na deva betg anc il 2007 fa in plus da 20,4%. Il medem vala per la PVL che noda in plus dad 8,2%. Pers vuschs han entant la Partida populara svizra (-10,2%), la Partida socialdemocratica (-8,1%), la Partida liberaldemocratica (-7,2%) e la Partida cristiandemocratica (-3,7%).
