En vista a las elecziuns dal Cussegl naziunal avertescha la Chanzlia chantunala ch’ils cudeschets da cedels electorals possian esser manglus. Tar tscherts cudeschets manchian paginas u las paginas sajan tagliadas memia pitschen. Pertutgads sajan tranter 25 e 50 exemplars da total sur 155'000 cudeschets. Quai ha ditg il vicechancelier Walter Frizzoni sin dumonda da RTR. Motiv saja in sbagl organisatoric tar l’interpresa externa ch’haja producì ils cudeschets.
Intginas producziuns incorrectas, che vegnan atgnamain bittà davent, èn tutina vegnidas furnidas a las vischnancas. Uschia in sbagl sappia tenor Walter Frizzoni capitar, i saja dentant schon «ein Ärgernis».
Barattar en vischnanca da domicil
Las vischnancas tramettan ils cudeschets ils proxims dis als votants. La Chanzlia chantunala recumonda d’examinar exact il material da votar. Cudeschets manglus possian vegnir midads tar las vischnancas. Las vischnancas èn orientadas en quest senn.
Ord l'archiv
Gia l'onn 2015 hai dà sumegliants problems. En singuls cudeschets eran per part duas giadas la medema glista.
RR novitads 08:00