Siglir tar il cuntegn

Header

cuntegn

Elecziuns Cussegl federal La fracziun da la PS sustegna Regula Rytz

La fracziun da la PS vul sustegnair la mesemna en las elecziuns dal Cussegl federal la candidata dals Verds. Attatgar vulan ils socialdemocrats il sez dal cusseglier federal Ignazio Cassis e be quel.

La fracziun socialdemocratica vegn damaun mesemna en il tschintgavel scrutini da las elecziuns dal Cussegl federal a dar la vusch a Regula Rytz dals Verds enstagl dad ad Ignazio Cassis da la PLD. La decisiun è crudada senza cuntravusch tar trais abstenziuns.

PS pretenda nova furmla magica

Quai ha ditg il schef da fracziun Roger Nordmann il mardi davant las medias. I saja uss temp per ina nova furmla magica. En futur duajan seser en la Regenza federala mintgamai dus represchentants da la PPS e da la PS e mintgamai in represchentant da la PLD, PCD e dals Verds.

Regula Rytz haja senz'auter il profil d'ina cussegliera federala, ha ditg Nordmann. La PS vegnia be ad attatgar il sez da Cassis en tut ils auters scrutinis vegnia la partida a sustegnair il candidat u la candidata en uffizi.

Rytz ha in bun sentiment

Suenter il hearing tar la fracziun da la PS ha Regula Rytz ditg davant las medias a Berna ch'ella saja cuntenta e giaja cun in bun sentiment en las elecziuns. L'audiziun tar ils socialdemocrats saja stada intensiva ed interessanta.

Uss na possia ella far nagut pli. La balla saja uss tar il parlament. La situaziun da partenza saja speziala. Igl haja dà in spustament verd istoric en il parlament, ma en il Cussegl federal n'haja nagin plaz pli. I saja dentant cler per ils Verds, ch'els veglian surpigliar responsabladad guvernamentala.

RTR novitads 17:00

Artitgels legids il pli savens