Siglir tar il cuntegn

Header

cuntegn

Elecziuns 2019 La Partida cristiandemocratica

Las duas chombras federalas a Berna prenda decisiuns ch'han consequenzas per singuls chantuns, regiuns u era per las minoritads. Perquai èsi central ch’era Rumantschs politiseschan en il Cussegl naziunal u en il Cussegl dals chantuns.

audio
Il sguard enavos
ord Actualitad dals 06.09.2019.
laschar ir. Durada: 1 minuta 35 Secundas.

Puncto fermezza e sezs tutga la PCD en il parlament federal tar las partidas mediocras. Sch’ins guarda dentant in zic pli precis sin la repartiziun en las duas chombras, ves’ins: En la chombra pitschna è la PCD cun 14 sezs la pli ferma. Là ha ella definitivamain in pled en il chapitel e nagin vegn sper ella ora. Dapi onns ed onns trametta la PCD grischuna – u pli baud ils conservativs – in represchentant en il Cussegl dals chantuns. Dapi otg onns è quai Stefan Engler ch'ha adina fatg ils megliers resultats e novs records tar sias elecziuns.

Partida cun lunga tradiziun

Er en il Cussegl naziunal è la PCD preschenta dapi passa 150 onns. Enturn ils onns 1950 ha ella perfin pudì trametter dus ed in temp schizunt trais umens en il Cussegl naziunal. Lezza fasa era dentant er ida a fin avant 30 onns e la partida ha mo pli in sez.

Dapi duas legislaturas occupescha il Sursilvan Martin Candinas quel sez. Quest onn candidescha el puspè e strusch insatgi dubita vi da ses success: La finala ha el fatg tar sia davosa elecziun las segund bleras vuschs dals elegids. Almain in sez dals parlamentaris grischuns a Berna vegn tradiziunalmain occupà dad in Sursilvan. Dal reminent: Da pudair trametter ina dunna a Berna, n'è fin uss aunc mai reussì a la PCD.

Sche nus [PCD Grischun] n'avessan nagin Martin Candinas, lura fiss quai fitg donn. Ma, jau sun persvas che nus avessan auters candidats fitg ferms che vegnissan d'occupar ses plaz.
Autur: Kevin Brunold PCD
audio
Bunura: Kevin Brunold sin la sutga chauda – l'intervista
ord Actualitad dals 13.09.2019.
laschar ir. Durada: 7 minutas 57 Secundas.

Sper Martin Candinas politisescha er Stefan Engler dapi otg onns a Berna. Ultimamain è el però stà en las lingias grassas. Stefan Engler è gist stà quel temp cusseglier guvernativ ch'ils impressaris han sgromà daners cun cunvegnas da pretschs. Sin la dumonda sche l'affera da cartels pudess far donn a la popularitad dad Engler, ha Kevin Brunold respundì:

Jau sai che Stefan Engler è ina fitg ferma persunalitad. En talas situaziuns èsi natiralmain malempernaivel. Il mender è: Betg tut ils fatgs èn sin maisa ed ins na po anc betg sa defender. Jau crai dentant che la populaziun sa che el è ina persuna integra, a la quala ins po sa fidar.
Autur: Kevin Brunold

La PCD perda vinavant

Il pli nov barometer d’elecziuns dat schlettas previstas per la PCD. Be stgars vegniss la partida – tenor quellas cifras – da mantegnair ina quota d’electuras ed electurs da sur 10%. La PCD sto pia tremblar, sch'ella po restar la quart ferma partida en Svizra. Tenor il barometer surpassan numnadamain ils Verds per l’emprima giada la marca da 10% ed uschia er la PCD – in pitschen terratrembel politic.

audio
Bunura: Tge schanzas ha la PCD? – Intervista cun il politolog Clau Dermont
ord Actualitad dals 13.09.2019.
laschar ir. Durada: 5 minutas 8 Secundas.

Situaziun en Grischun stabila – «Candinas ed Engler restan»

En Grischun dentant para tut da restar pli stabil, valitescha il politolog Clau Dermont. La PCD è anc adina la segund ferma partida, malgrà che la PCD ha pers in sez tar las elecziuns dal Cussegl grond. Betg temair per lur sezs ston tenor Dermont ils dus candidats per las elecziuns federalas. Martin Candinas vegn a restar a Berna sco cusseglier naziunal e quai ensemen cun ses collega dal Cussegl dals chantuns, Stefan Engler.

audio
Bunura: Tge, sche la PCD svanescha?
ord Actualitad dals 13.09.2019.
laschar ir. Durada: 2 minutas 12 Secundas.

RTR Elecziuns 2019

Artitgels legids il pli savens