Siglir tar il cuntegn

Header

cuntegn

Duo 5: Maissen & Campell Cun calma sin visita a Turitg

Discutar cun la populaziun saja in bel pensum da politicras e politichers. Exact quai han Carmelia Maissen (PCD) e Duri Campell (PBD) fatg a Turitg vid maisa cun Petra Camathias e Peter Vesti - els che s'engaschan per la promoziun dal rumantsch en il chantun da Turitg.

Carmelia Maissen e Duri Campell vivan omadus en ina regiun muntagnarda. Entant ch'il burgaisdemocrat Duri Campell n'è betg stà pli ditg davent, ha la cristiandemocrata Carmelia Maissen vivì numerus onns en la Bassa - tranter auter 13 onns a Turitg. Omadus politichers èn dentant da l'avis, ch'ils parlamentaris grischuns hajan er ina responsabladad per tut quellas e quels Rumantschs che vivian en la diaspora.

audio
Bunura: Ti ed jau en la diaspora – Spetgas ord vista politica
ord Actualitad dals 02.10.2019.
laschar ir. Durada: 3 minutas 21 Secundas.

I saja fitg interessant da s'inscuntrar cun Petra Camathias - ch'è s'engaschada sco presidenta da l'uniun «Quarta Lingua» per curs da rumantsch per scolars, e Peter Vesti - che ha cun-inizià ina canorta rumantscha a Turitg. Persunas che s'engaschian sco els dus sajan exact quels ch'i valia da sustegnair, uschia il tenor da Carmelia Maissen e Duri Campell.

5 dumondas a Carmelia Maissen

Avrir la box Serrar la box

Savessas Vus s’imaginar d’abitar a Turitg ubain en in autra citad gronda en la Bassa?

Sco muntagnarda urbana giaud jau las inspiraziuns differentas da champagna e citad – sch'jau sai adina puspè ir en ils culms è er viver en ina citad insatge bel.

Tge mancass il pli fitg e tge stimassas Vus il pli fitg?

Il pli fitg mancass a mai il sentiment da cuminanza da nossas structuras pitschnas. Persuenter giudess jau la purschida (multi)culturala e la vitalitad.

Vus essas stada numerus onns en la diaspora – daco essas Vus turnada?

L'amur ha tratg enavos mai en ils culms. Ed il gust da s'engaschar en in conturn cun il qual jau s'identifitgesch cumplainamain.

Essas Vus ina persuna che lascha encrescher?

En connex cun carstgauns schon, en connex cun lieus damain, là èn las marveglias da vesair insatge nov pli fermas.

Co sa sentis Vus sco rumantscha cura che Vus essas en la Bassa?

superbia

5 dumondas a Duri Campell

Avrir la box Serrar la box

Savessas Vus s’imaginar d’abitar a Turitg ubain en in autra citad gronda en la Bassa?

Quai è difficil da giuditgar cunquai ch’jau n’hai mai vivì en ina citad pli gronda per pli lung temp. Però jau na crai plitost betg.

Tge mancass il pli fitg e tge stimassas Vus il pli fitg?

Sco pur mancass a mai il pli fitg la natira. Ma er mes temp liber passent’jau fitg gugent ora en il liber, saja quai cun skis, passlung, cun il bike u er a chatscha. En las citads èn las purschidas culturalas sco per exempel concerts, kinos, exposiziuns etc. pli grondas ma er las pussibilitads per sa scolar vinavant.

Daco essas Vus mai stà pli ditg davent dal Grischun?

Suenter mes emprendissadi a Landquart ed il servetsch militar sun jau turnà a chasa en l’Engiadina, sun maridà ed hai surprendì il manaschi puril ed il campadi da mes geniturs. Uschia sun jau stà lià.

Essas Vus ina persuna che lai encrescher?

Gea, cunzunt per la patria, mes contacts persunals e mes ambient social.

Co sa sentis Vus sco rumantsch cura che Vus essas en la Bassa?

Sco rumantsch ma sent jau fitg bain en la Bassa, causa che l’interess per la quarta lingua naziunala è fitg grond e sche insatgi auda ch’ins discurra rumantsch lura vegn’ins tgunsch en contact cun autra glieud.

Il project da RTR «Ti ed jau faschain politica»

Avrir la box Serrar la box

Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:

  • 04-09 Ovras socialas tar Ruodi Duschletta, Sent
  • 11-09 Sanadad tar Sandra ed Andri Baltermia, Salouf
  • 18-09 Economia tar Flurina e Simon Kaufmann-Henkel, Cuira
  • 25-09 Clima tar ina classa da la scola media, Glion
  • 02-10 Diaspora tar Peter Vesti e Petra Camathias, Turitg

Tar mintga tema dain era in sguard en l'istorgia, preschentain cifras e fatgs e numnain las sfidas actualas.

Las elecziuns naziunalas èn ils 20 d'october 2019.

RR actualitad 07:00

Artitgels legids il pli savens