Siglir tar il cuntegn

Header

audio
Bunura: Elecziuns 2019 – Partidas pli spezialas: DLSSLP e sias finamiras
Or da Actualitad dals 09.10.2019.
abspielen. Laufzeit 03:37 Minuten.
cuntegn

DLSSLP «Nus essan ina partida da satira seriusa»

DLSSLP è curt per «Die liebe, sehr sehr liebe Partei». La partida ch'i dat dapi trais onns candidescha en il chantun Berna per il Cussegl naziunal. Grondas schanzas na vegnan ses candidats dentant betg ad avair.

Betg mo cun leger il num, er cun dar in sguard en il program da partida badan ins: la DLSSLP n'è betg ina partida classica.

E bain ch'els han pretaisas sco «mintga dumengia scumond da handy» e «dunnas duain survegnir ina paja, ch'è adina ina giada pli eguala sco quella d'umens»: Sco partida da spass na vesan els betg lur partida.

Nus essan ina partida da satira seriusa – ubain ina partida seriusa da satira.
Autur: Christoph GosteliCandidat da la DLSSLP pel Cussegl naziunal a Berna

Quels che sa fatschentan in pau cun satira sappian, uschia il co-fundatur Christoph Gosteli, che la satira ha er in cuntegn essenzial fitg serius.

Partida sco cuntrapais

La DLSSLP datti dapi la fin dal 2016. Tar ils fundaturs da la partida tutga Christoph Gosteli. Il sociolog ha fundà la partida ensemen cun ina collega. Motiv perquai: Tenor els na represchentia il parlament betg il pievel. Quai veglian els midar. La DLSSLP duess esser in cuntrapais.

Ch'els han in umor spezial, quai badan ins er tar il num «Die liebe, sehr sehr liebe Partei»:

Structuras avertas ed ierarchias plattas

Sin la dumonda quants commembers che la partida haja, na pari betg simpel da survegnir ina resposta. Tenor Christoph Gosteli hajan els 15 candidats per il Cussegl naziunal e vinavant «ina pluna simpatisants.» Structuras fixas ed ierarchias n'hajan els betg propi.

Nus essan in mantun da persunas che vulan punctualmain contribuir insatge. [...] Nus chapin quai sco sistem avert, nua che mintgin po vegnir ed ir.
Autur: Christoph GosteliCandidat da la DLSSLP pel Cussegl naziunal a Berna

Els vulan evitar, ch'els valan sco instituziun. Restar flexibel saja per els impurtant.

Strusch schanzas per in sez

Il chantun Berna ha 24 sezs en il Cussegl naziunal. Per quels candideschan en tut 651 persunas sin 34 glistas. 31 da quellas èn en ina colliaziun da glistas – la DLSSLP dentant betg. Lur schanzas èn quasi nulla.

Las finanzas da la DLSSLP

Personen-Box aufklappenPersonen-Box zuklappen

Ils raps per finanziar il cumbat electoral ramassa la DLSSLP tras crowdfunding. La mira per cuvernar ils custs da placats ed autra reclama saja tenor Christoph Gosteli tar 1'000 francs. Actual sajan els en in lieu en la mesadad.

Sco congual: La PCD, la PBD e la PLD Grischuna han tenor srf.ch mintgamai in budget da var 150'000 francs. La PS Grischuna ha in budget da var 107'000 francs, la PVL 40'000 francs e la Verda 20'000. Da la PPS Grischuna na datti naginas indicaziuns.

Per il sez na vai ad els dentant betg. Tar questas elecziuns hajan els pudì far attent ad els. Vinavant hajan els gudagnà intgins simpatisants. Uschia hajan els er senza sez gudagnà ina pluna, manegia Christoph Gosteli. E vinavant:

Nus vegnin en mintga cas a far il meglier resultat tar elecziuns dal Cussegl naziunal en l'istorgia da la partida.
Autur: Christoph GosteliCandidat da la DLSSLP pel Cussegl naziunal a Berna

Cunquai ch'els candideschan per l'emprima giada, na vegn quai dentant betg ad esser difficil.

RR actualitad 07:00