Siglir tar il cuntegn

Header

Ina luvrera che dumbra ora las vuschs tar las elecziuns.
Legenda: Las vuschs da las elecziuns dal Cussegl naziunal e dal Cussegl dals chantuns vegnan dumbradas ora. Keystone
cuntegn

Cussegl dals chantuns Favurits tranter ils cussegliers e las cusseglieras dals chantuns

Il Cussegl dals chantuns n’è anc betg cumplet. Fin uss èn 27 da 46 sezs occupads, quai munta che 19 mancan anc. Perquai dovri in segund scrutini. Quels vegnan fatgs enfin ils 24 da november en 12 chantuns.

9 candidats e candidatas èn tenor experts cleramain favurits. D’ina vart èn quai tschintg cussegliers dals chantuns che lessan vegnir reelegids. A Soloturn Roberto Zanetti da la PS, a Friburg ils dus actuals Christian Levrat, president da la PS svizra e Beat Vonlanten da la PCD. Era a Son Gagl fiss quai ina gronda surpraisa sch’ils actuals cussegliers Beni Würth da la PCD e Paul Rechsteiner da la PS na vegnissan betg elegids.

Ulteriurs favurits

Era a Genevra saja il cas cler, Lisa Mazzone dals Verds e Carlo Sommaruga da la PS duessan vegnir elegids. In ulteriur sez per ils Verds duessi dar en il Vad per Adèle Thorens. En l’Argovia ha Thierry Burkhart da la PLD survegnì las bleras vuschs en l’emprim scrutini, el vala era sco cler favurit.

10 da november: Friburg, Genevra, Vad

En il Vad è il sez d’Adèle Thorens dals Verds bunamain garantì, ella ha fatg il meglier resultat en l’emprim scrutini. La dumonda è tgi che survegn il segund sez. Ada Marra da la PS, ch'ha cuntanschì sin il segund plaz u tuttina Olivier Français da la PLD. La PPS ha retratg ses dus candidats per sustegnair indirectamain la PLD e betg la PS.

17 da november: Berna, Soloturn, Son Gagl, Tessin, Turitg, Zug

A Berna è anc tut avert. Ils Bernais pudessan trametter per l’emprima giada in duo cotschen-verd en il Cussegl dals chantuns. L’actual cusseglier Hans Stöckli da la PS e la Verda Regula Rytz han fatg ils megliers resultats. Dentant era ils burgais avessan gugent quests dus sezs, Werner Salzmann da la PPS e Christa Markwalder da la PLD.

En il Tessin duess Philippo Lombardi da la PCD, l’actual cusseglier dals chantuns, vegnir reelegì. Per il segund sez datti in cumbat tranter trais persunas, Marco Chiesa da la PPS, Marina Carobbio da la PS e Giovanni Merlini da la PPS.

A Turitg datti in duel per il segund sez tranter Ruedi Noser da la PLD e Marionna Schlatter dals Verds. Roger Köppel da la PPS è sa retratg per sustegnair la PLD, Tiana Moser dals verd-liberals è dentant era sa retratga, uschia che Marionna Schlatter dals Verds pudess ertar sias vuschs.

A Zug è il cusseglier actual Peter Hegglin da la PCD vegnì elegì. Per il segund sez datti in cumbat burgais tranter Matthias Michel da la PLD e Heinz Tännler da la PPS. Decisiv vegn ad esser, co ch’ils votants da la PCD sa decidan.

24 da november: Argovia, Basilea-Champagna, Sviz

En l'Argovia è Thierry Burkhart da la PLD cler favurit. Cédric Wermuth, ch'era sin il terz plaz, desista sin il segund scrutini, uschia sustegn el Ruth Müri dals verds. Schanzas pli grondas haja dentant Hansjörg Knecht da la PPS ch'aveva fatg il segund meglier resultat.

En il chantun Basilea-Champagna cumbattan duas dunnas per il segund sez vacant, la favurita Daniela Schneeberger da la PLD, ch'ha fatg il segund plaz, e Maya Graf dals verds. Uschia sesa l'emprima giada ina dunna da Basilea-Champagna en il Cussegl dals chantuns.

Enfin uss trametteva Sviz dus candidats da la PPS. Dentant ha Peter Föhn demissiunà. Per ses sez datti in cumbat tranter Pirmin Schwander da la PPS ed Othmar Reichmuth da la PCD. Da principi duess Schwander esser il favurit, Sviz è il center tradiziunal da la PPS, dentant savess Othmar Reichmuth, sco directur dal departament da construcziun rimnar vuschs sur ils cunfins da las partidas.

RR actualitad 12:00