Avessan las elecziuns federalas gì lieu gia mez settember, fissan las quotas d'electurs per las singulas partidas sa midadas – la fermezza da las partidas resta dentant. Tenor las intenziuns d'eleger actualas fiss la PPS pia anc adina la partida cun la pli gronda quota d'electurs, suandada da la PS, la PLD e la PCD.
Ils Verds e la PLD gudognan vuschs
Cun in plus dad 1,6 puncts procentuals pon ils Verds actualmain quintar cun il pli grond augment da vuschs. Tenor retschertga cuntanschan els nov ina quota d'electurs dad 8,7%. Els èn uschia puspè datiers da lur resultat dal 2011.
Segunda victura dal barometer d'elecziuns actual è la PLD. Ils Liberaldemocrats pon augmentar lur quota d'electurs per 1,3 puncts procentuals sin 17,7%. Cun questa cumpart na pudess la partida però betg cuntanscher il livel ch'els avevan en lur megliers temps, però almain il livel ch'els han gì il 2007. Lur finamira da vulair surpassar ils Socialdemocrats en las proximas elecziuns, na pon els cun il stan actual betg realisar.
Er la PS augmenta sia quota d'electurs per in mez punct procentual sin 19,3%. Er ils Verdliberals pon nudar in plus dad 1,1 punct procentual e vegnan actualmain sin ina quota da 5,7%. Quai fiss in anc meglier resultat che quai che la partida ha gia realisà il 2011.
PPS e PCD perdan vuschs
Tenor la retschertga perda la PPS 2 puncts procentuals – cumpareglià cun las elecziuns dal 2015 – ed arriva anc sin ina quota d'electurs da 27,4%. Quai fiss dentant anc adina il terz pli bun resultat en l'istorgia da la partida.
In zic pli pauc perdess la PCD, numnadamain 1,5 puncts procentuals. Sch'ins metta quella sperdita en relaziun tar la grondezza da la partida, è questa sperdita pli gravanta. La PCD vegniss pia mo anc sin 10,1% da las vuschs. Cun quest resultat avess la partida dapi il 2007 pers bunamain in terz da lur electurs.
Er plitost negativas èn las prognosas per la PBD. Ella pudess perder 0,9 puncts procentuals. Sco nova partida ha ella il 2011 gist survegnì 5,4% da las vuschs. Gia il 2015 ha la partida dentant puspè pers ina part da sia basa e vegn actualmain anc sin ina quota d'electurs da 3,2%.
L'orientaziun politica fa las decisiuns
Tgeninas èn las pli impurtantas raschuns per sa decider per ina partida? La retschertga da sotomo mussa, che l'orientaziun politica d'ina partida è per ina gronda part das electurs – numnadamain per 58% – il pli impurtant motiv per la dar la vusch. Sco segund motiv suonda la cumpetenza da chattar schliaziuns – quai per 23% dals electurs. Per 13% stat la moda e maniera da politisar en il center e mo per 6% èn persunalitads da la partida decisivas.
Surtut tar las partidas da pol (PPS, PS e Verds) è l'orientaziun politica da gronda impurtanza. Il pli pauc relevant è quella per electurs da la PCD e PBD. Che l'orientaziun n'è betg uschè impurtanta per las duas partidas, pudess vegnir interpretà sco ina da las raschuns per ils problems structurals da las partidas dal center burgaisas. L'orientaziun politica n'è numnadamain tar omaduas partidas betg uschè simpla d'eruir.
Assicuranzas socialas en il focus
Tenor retschertga èn per 42% dals electurs las cassas da malsauns ina da las trais top sfidas per la Svizra. Per 37% tutga la refurma da la prevenziun per la vegliadetgna latiers.
Schebain ils Verds sco er ils Verdliberals gudognan vuschs e quai per ina giada betg sin donn e cust dals Socialdemocrats. La stad chauda e sitga para dad avair sensibilisà ils electurs sin il tema midada dal clima ed emissiuns da CO2. Per 30% dals votants tutga quest tema lura er tar ils pli impurtants. Uschia ch'il tema ecologic ha bunamain la medema relevanza sco la migraziun cun 31%.
En egl dat che temas economics paran d'avair perdì marcantamain muntada. Mo gist 11% han inditgà da valitar la capacitad da concurrer ed l'economia sco ina da las top sfidas per la Svizra.
Decisiun ord persvasiun u mancanza d'alternativas?
56% dal electurs dals Verds e 51% dals electurs da la PPS dattan giu lur vusch per la partida ord «cumplaina persvasiun». Ils pli paucs persvadids datti tar ils aderents da las partidas PVL e PBD. Quellas duas partidas vegnan fitg savens tschernidas ord «mancanza d'alternativas». 21% dals electurs dals Verdliberals argumenteschan ch'els elegian la partida perquai ch'els «vulan insatge nov». La partida che ha cun 28% ils pli blers aderents che elegian ord «attaschament da blers onns» è la PCD.
Malcuntentientscha cun il Cussegl naziunal
Per ina gronda part dals electurs è il Cussegl naziunal en la constituziun actuala orientà politicamain memia ferm a la dretga. In terz d'els è da l'opiniun ch'il cussegl politiseschia memia ferm a sanestra. Mo gist 20% pensan che l'orientaziun politica è gista. En egl dat che la gronda part dals aderents da las partidas burgaisas da mez (PCD, PVL, PBD) chattan ch'il Cussegl naziunal politiseschia memia ferm a dretga. Uschia sa mussa ch’ils electurs giavischan plitost ina correctura da l’orientaziun politica dal parlament vers la sanestra che vers la dretga.
RR novitads 17:00
