Siglir tar il cuntegn

Header

Video
Barometer d'elecziuns: La PCD vegn sut squitsch e l'unda verda cuntinuescha
Or da Telesguard dals 05.09.2019.
laschar ir
cuntegn

3. barometer d'elecziuns 2019 La «unda verda» resta ferma

Er sur stad n'ha la «unda verda» betg pers forza, anzi. Pli pauc che dus mais avant las elecziuns naziunalas 2019 ha la Partida ecologica svizra PES pudì augmentar sia cumpart da vuschs e vegniss actualmain sin ina cumpart d'electuras e d'electurs da 10,6% – il 2015 aveva la partida cuntanschì 7,1%.

Curt e concis:

  • Verds e Verdliberals rinforzan lur trend positiv
  • Tar PCD e PBD s'accentuescha il trend negativ
  • PPS è sa stabilida en il minus
  • La PS e la PLD è il trend in zic «volatil»

Cun 10,6% ed in plus da 3,4 puncts procentuals nodan ils Verds la meglra valur da questa legislatura e da tut ils barometers. I fiss er il meglier resultat d'elecziun ch'els avessan cuntanschì insacura en Svizra. Il meglier resultat fin uss è stà ina cumpart da 9,6% tar las elecziuns naziunalas da l'onn 2007.

diagram
Legenda: RTR, grafica

Er ils Verdliberals èn sin buna via e vegnissan il mument sin 6,9%. Quai è era per els il meglier resultat fin uss (5,4% il 2011). Ensemen avessan las duas partidas dal spectrum verd ina cumpart da 17,5%, quai ch'è schizunt dapli che la PLD che po mantegnair ses dumber d'electuras e d'electurs.

PCD mo anc sin plaz 5?

Sch'in tal sigl gartegia effectivamain als Verds, lura datti ina midada en la rangaziun da las pli fermas partidas politicas en Svizra. La PCD faschess actualmain in minus dad 1,4 puncts procentuals. Cun ina cumpart d'electurs da 10,2% dumagnassan ils cristiandemocrats l'obstachel simbolic da 10%. Els fissan lura dentant sin in rang suenter ils Verds.

diagram
Legenda: RTR, grafica

PPS po stabilir la digren, PBD betg

Il barometer d'elecziuns actual, il quart durant ils ultims 12 mais, è l'emprim nua che la Partida populara svizra na perda betg anc ina giada vuschs. Cun in minus d'actualmain 2,6 puncts procentuals cuntanschess la PPS ina cumpart da 26,8%. Ina valita ch'è da cumparegliar cun ses resultats dals onns 2003 e 2011.

Auter è quai tar la Partida burgais-democratica. Ella perda «sulet» 1,5 puncts procentuals, quest dumber munta dentant passa in terz da ses electurs. Il trend negativ per la PBD è sa rinforzà dapi l'ultim barometer d'elecziun.

Las pli grondas sfidas politicas

Ils quatter barometers d'elecziuns da l'ultim onn mussan, che l'impurtanza dals temas politics èn restads constants. Sin l'emprim plaz èn er questa giada las premias da las cassas da malsauns. Independent da la stagiun e dal svilup da l'aura resta er il clima in tema fitg impurtant per ils electurs e las electuras. Pers impurtanza han percunter las relaziuns cun l'Uniun europeica.

diagram
Legenda: RTR, grafica

Detagls da l'enquista

Personen-Box aufklappenPersonen-Box zuklappen

L'enquista ha l'institut da perscrutaziun Sotomo fatg sin incumbensa da la SRG SSR e quai tranter ils 19 ed ils 25 d'avust. En total èn 17'128 persunas sa participadas (11'746 en Svizra tudestga, 4'607 en Svizra franzosa e 775 en Svizra taliana).

Il spazi da sbagl è + / - 1,2 puncts procentuals.

RR novitads 17:00