Siglir tar il cuntegn
cuntegn

Svizra «Egon» vegn cun burasca e naiv

Suffel da stemprà, naiv ed interrupziuns en il traffic da viafier: il bass «Egon» ha purtà a la Svizra la notg passada l'emprim stemprà da quest onn. A Basilea ed en la Svizra orientala èn crudads ora divers trens, en il Tessin ha la naiv chaschunà impediments da traffic.

En il nord da las Alps han sufflà ferms vents. A Cressier NE ha il vent furià cun ina spertadad da 117 km/h, a Lucerna cun 111 km/h, quai tenor indicaziuns dal servetsch da l'aura MeteoGroup. Cun fermezza d'orcan, numnadamain cun 154 km/h, ha il vent sufflà sin il Säntis. Sin il Kronberg AI hai suflà cun 150 km/h, sin il Pilatus cun 146 km/h e sin il Chasseral cun 144 km/h.

Era per il Grischun aveva SRF Meteo annunzià ferms vents en il Puschlav e la regiun da Cuira. Tenor la polizia chantunala n'hai però dà nagins donns en il Grischun.

Suenter il stemprà vegn la naiv

carta che mussa las quantitads da naiv che vegnan
Legenda: Blera naiv datti en il nord da las Alps. SRF

Tenor il servetsch da l'aura fai propi enviern la fin da l'emna. Nà dal nordvest sa derasa la naiv. A Turitg, Berna u Losanna poi dar fin 10 cm naiv. Il pli bler naiv poi dar en las Alps cun per part 30 cm en las valladas e fin 80 cm en muntogna. Vitiers vegni pli fraid. L'emna proxima poi dar intgins dis da glatsch, quai tenor SRF Meteo.

Interrupziuns d'electricitad en Frantscha e Germania

Da cumbatter cun la burasca ha era la Frantscha gì. En il nord dal pajais èn 190’000 chasadas restadas senza forza electrica. Er en la Germania ha «Egon» chaschunà interrupziuns d'electricitad ed impediments da traffic. Dapi mesanotg hajan els problems massivs pervi dal stemprà, ha ditg in pledader dal center da situaziun a Saarbrücken. Il servetsch da l'aura tudestg ha avertì da malauras en plirs stadis federativs.

RR novitads 06:00