Educaziun sexuala na duai betg vegnir limitada

L'educaziun sexuala na duai betg vegnir declerada sco chaussa privata. Suenter il Cussegl naziunal ha er il Cussegl dals chantuns refusà ina iniziativa che vul bandischar il tema reproducziun da las stanzas da la scola primara e la scolina. L'educaziun sexuala duai restar chaussa dals chantuns.

Il Cussegl dals chantuns na vul betg limitar u scumandar l'educaziun sexuala.

Legenda da maletgs: Il Cussegl dals chantuns na vul betg limitar u scumandar l'educaziun sexuala. Keystone

L'educaziun sexuala na dastgia betg vegnir limitada u schizunt scumandada, ha punctuà il Cussegl dals chantuns. Quella porschia ina protecziun effizienta cunter abus sexuals. La chombra pitschna cusseglia perquai da refusar l'iniziativa - "Protecziun da la sexualisaziun en scolina e scola primara".

Iniziants teman influenza nuschaivla

Ils iniziants teman che la pratica d’ozendi influenzeschia a moda nuschaivla il cumportament sexual dals uffants. Els pretendan perquai ch’i vegnia discurrì pir a partir dal 12avel onn da naschientscha davart la reproducziun en il rom da biologia.

RR novitads 06:00