Siglir tar il cuntegn

Svizra Economia svizra stagnescha en terz quartal

L’economia Svizra na vegn betg propi vinavant. Uschia stagnescha il product naziunal brut, sco il Secretariat da stadi per economia SECO scriva.

L'intern d'ina fabrica.
Legenda: Ils ferms exports da products en las spartas farmazia e chemia han gidà a gulivar la bilantsch'economica. Keystone

Ils experts n’eran betg unids, en tge direcziun che l’economia vegnia sa sviluppar. Per il terz quartal avevan ils experts prognostitgà in plus da 0,2%. Arrivà n'è quel dentant betg, uschia il SECO.

Damain exports da servetschs

La bilantscha nunmidada resulta cunzunt da las expensas dal stadi (+1,8%). Las investiziuns en construcziun e l’export da servetschs percunter è sa reducì tranter fanadur e settember.

Ils tegnairchasa privats han consumà in zic dapli ch’en il segund quartal (+0,4%). La pli gronda cumpart a questa creschientscha deriva dals champs sanadad, traffic, abitar ed energia.

Chemia e farmazia han salvà bilantscha d'exports

Ils exports da rauba èn creschids per 0,5%. Quai cunzunt pervi da la dinamica dals exports da chemia e farmazia. Ils ulteriurs segments sco per exempel l’export d’uras, bischutaria ed instruments da precisiun han per la gronda part nudà ina digren.

En il segund quartal da quest onn nudava il product naziunal brut ina creschientscha (+0,2%), en l’emprim quartal nudava il product naziunal brut perencunter ina digren (-0,3%).

RR novitads 08:00