Interpresas svizras han vendì il fanadur damain rauba a l’exteriur. En tut han ellas exportà rauba per 21,6 milliardas francs – in minus da 4,3% cumpareglià cun il mais avant, scriva l’Uffizi federal da la duana e la segirezza dals cunfins. Cun excepziun da l’industria dad uras hajan bunamain tut las branschas sentì la sminuziun. La branscha farmaceutica e chemica che contribuescha bundant la mesadad da tut ils exports haja exportà 6,3% damain ch'il zercladur. Ils exports da maschinas e d’electronica sajan sa reducids per 9,6% suenter ch'els eran creschids per trais mais en fila.
Cunzunt haja la Svizra exportà bler damain en l’America dal Nord (-17%). Er ils exports en pajais europeics èn ids enavos (-2,5%). Sulettamain ils exports en l’Asia sajan s’augmentads (+6,5%).
Sche las cifras dal fanadur èn ina valur divergenta u il cumenzament dad in declin pli lung na sa lascha anc betg dir. Tenor l'Uffizi federal da la duana e la segirezza dals cunfins saja il trend però sa midà cun las pli novas cifras. El vesa in trend stagnond.
