Siglir tar il cuntegn
cuntegn

Svizra È Dumeni Columberg sa schluità en Chasa federala?

Tgi che ha guardà l’elecziun dal nov cusseglier federal a la televisiun la mesemna passada, ha adina puspè vesì l’anteriur cusseglier naziunal grischun, Dumeni Columberg. Intervistas na ha el dà naginas, uschia ch’i resta la dumonda, tge ch’el ha propi fatg en la sala dals pass pers.

Dumeni Columberg (davos) durant in'intervista cun il cusseglier naziunal dal Tessin, Marco Romano.
Legenda: Dumeni Columberg (davos) durant in'intervista cun il cusseglier naziunal dal Tessin, Marco Romano. SRF

Simplamain sa schluità en Chasa federala a Berna per uschia pudair laschar reviver ils temps da pli baud e dar ina curta baterlada cun il nov elegì cusseglier federal, Ignazio Cassis n'haja el francamain betg fatg, punctuescha Dumeni Columberg ch'è stà durant 20 onns (1979 fin 1999) parlamentari en il Cussegl naziunal.

Betg dapertut access

«Mintga anteriur parlamentari po dumandar per in badge sch’el vul», di Columberg. «E cun quel ha el liber access en il parlament federal fin a la sala dals pass pers – la Wandelhalle.» En la sala dal Cussegl naziunal – là nua ch’el ha cundecidì ils onns 1980 e 90 tgi che duai vegnir il proxim cusseglier federal – n'ha el dentant gì nagin access.

Puspè vesair ina elecziun da datiers

Ch'el ha fatg diever da quella purschida da l'Uniun dals anteriurs commembers da l'Assamblea federal la mesemna, ha dentant betg mo da far ch'el ha gì il di avant a Berna ina sesida da suprastanza da gest quella uniun. Mabain haja el per l’ina vulì vesair puspè ina giada da datiers co uschia ina elecziuns d’in cusseglier funcziunescha e per l’autra haja el era vulì tgirar uschia ils vegls contacts.

Engrazià per ils pleds en rumantsch

Pudì discurrer ha l’anteriur cusseglier naziunal Dumeni Columberg betg mo cun differents parlamentaris, mabain era cun il nov elegì cusseglier federal, Ignazio Cassis. «Jau hai gratulà ad el ed engrazià per quels pleds per rumantsch ch’el ha ditg», tradescha Columberg. E ch’el sa legria sch’ins possia era vinavant mantegnair il contact.

RR actualitad 17:00


Ord l'archiv…

Cura che Dumeni Columberg era anc en acziun.