Siglir tar il cuntegn
cuntegn

Svizra Dunna Holla visita Paris

Suenter che la Dunna Holla ha chaschunà per caos sin las vias e sin las rodaglias svizras, fa ella uss visita a Paris. En la chapitala franzosa hai dà 20 centimeters naiv e grond caos da traffic.

Dapi il 2013 n'haja betg pli dà tanta naiv a Paris, uschia il pledader da la regenza Benjamin Griveaux. En in di haja dà 15 enfin 20 centimeters naiv. E quai ha procurà per caos: Il mardi avevan ils autos gia furmà colonnas da radund 740 kilometers en il territori da la citad principala. 1'500 enfin 2'000 manischunz han stuì spetgar sin las vias. Ed er la mesemna èn tenor la polizia plirs tschients autos stads bloccads.

Griveaux ha appellà als burgais da laschar a chasa l'auto e viagiar cun il tren. Ma er sin ils binaris ha la naiv chaschunà impediments e retards. Blers pendularis hajan crititgà ch’els na sajan betg vegnids infurmads bain avunda davart la situaziun da traffic actuala.

Far umens da naiv ed ir cun skis a Paris

Auters han dentant gì dapli plaschair da la naiv. Las raits socialas èn stadas plainas cun fotografias da Paris cun ina cuverta da naiv. E la glieud ha perfin fatg umens da naiv ed è ida cun skis u snowboard sin il mut davant la basilica Sacré-Cœur.

Il cor da Paris, la Tur d'Eiffel, pon ins il mument però mo contemplar da lunsch. Quella po far ina curta sien d'enviern sut la cuverta da naiv.

RR novitads 17:00